У РФ малдаўскага алігарха Плахатнюка завочна арыштавалі за вывад мільярдаў і наркагандаль

Беглы алігарх можа знаходзіцца ў ЗША.

Цвярскі суд Масквы завочна арыштаваў аднаго з найбагацейшых людзей Малдовы - палітыка і медыямагната Уладзіміра Плахатнюка. Яго вінавацяць у арганізацыі схемы адмывання мільярдаў з Расеі, у наркагандлі і замаху на забойства. Пра гэта піша РБК.

«Паводле інфармацыі ўправы ўласнай бяспекі ФСБ, Плахатнюк знаходзіцца ў ЗША, у штаце Фларыда, у Маямі», - агучыў суддзя даведку з матэрыялаў справы.

Паводле звестак следства, усяго з Расеі ім было выведзена 37 млрд рублёў.

Адвакат бізнэсоўца Дар'я Канстанцінава сказала, што абарона адмаўляе ўдзел Плахатнюка ў злачынствах. На яе думку, «ёсць усе падставы меркаваць пра палітычна матываваны характары крымінальнай справы», бо дзеянні былога лідара Дэмакратычнай партыі Малдовы ўступалі ў супярэчнасць з пазіцыяй Масквы.

У лютым МУС назвала Плахатнюка арганізатарам «малдаўскай схемы» ў вывадзе грошай з Расеі разам з бізнэсоўцам Вячаславам Платонам, асуджаным у Малдове ў 2017 годзе на 18 гадоў за незаконныя валютныя аперацыі.

Пра «малдаўскую схему» або «ландрамат» СМІ стала вядома ў 2014 годзе. Напрыклад, газета «Ведомости» распавяла пра змест ліста службы фінансавага маніторынгу і службы папярэджання і барацьбы з адмываннем грошай Нацыянальнага цэнтра барацьбы з карупцыяй Малдовы ў расейскае МУС з апісаннем схемы вываду з Расеі амаль Br700 мільярдаў з выкарыстаннем больш чым 20 банкаў. Сутнасць гэтай схемы зводзілася да падпісання дамоваў пазык, паводле якіх расейскія кампаніі-пасярэднікі для вываду грошай нібыта атрымлівалі пазыкі на сотні мільёнаў даляраў або выступалі ў іх даручальнікамі. Абавязацельствы ў фіктыўных пазыках не выконваліся, і крэдыторы звярталіся ў суды Малдовы, бо даручальнікамі ў крэдытах выступалі таксама грамадзяне гэтай краіны (многія з іх не ведалі пра свой удзел ва ўгодах з вялізнымі сумамі).

Карумпаваныя суддзі і прыставы, падкантрольныя малдаўскім арганізатарам схемы, выносілі пастановы аб спагнаннях на мільярды даляраў паводле такіх спраў. Мноства расейскіх кампаній-пасярэднікаў у «малдаўскай схеме» трымалі рахункі ў пэўных банках, сярод якіх «Рублёўскі», «Інтэркапіталбанк», «Смартбанк», «Балтыка», «Стратэгія», «Еўрапейскі экспрэс», «Рускі зямельны банк» (РЗБ ), «Тэмпбанк», «Окскім» (іх ліцэнзіі былі адкліканыя ЦБ у 2013-2016 гадах). Усе гэтыя крэдытныя арганізацыі мелі карэспандэнцкія рахункі ў падкантрольным арганізатарам BC Moldindconbank S.A. і праводзілі праз яго сумнеўныя аперацыі.

Пазней існаванне «малдаўскай схемы» з удзелам расейскіх банкаў пацвердзілася звесткамі МУС Расеі. Шэраг яе фігурантаў затрымалі. У чэрвені стала вядома, што МУС абвінаваціла Плахатнюка таксама ў арганізацыі злачыннай супольнасці (артыкул 210 КК) і кіраўніцтве наркакартэлямі, якія забяспечвалі пастаўкі мараканскага гашышу з Паўночнай Афрыкі ў краіны ЕЗ і СНД. У матэрыялах справы сцвярджалася, што прадстаўнікі злачыннай супольнасці, якой кіраваў бізнэсовец, займаліся і «гандлем людзьмі, сутэнёрствам, заказнымі забойствамі, рэйдэрскімі захопамі банкаў і прадпрыемстваў, крадзяжамі з фінансава-банкаўскай сістэмы» Малдовы. Як мяркуе следства, Плахатнюк меў значны ўплыў у крымінальным асяроддзі, манапалізаваў энэргетычную сістэму і СМІ краіны, стварыў і ўзначаліў Дэмакратычную партыю, пасля чаго, атрымаўшы ўплыў на органы дзяржаўнай улады Малдовы, у мэтах асабістага ўзбагачэння заступаўся за рознага кшталту злачынныя арганізацыі.

У 2017 годзе Плахатнюк быў таксама завочна арыштаваны Басманны судом Масквы на хадайніцтва галоўнай следчай управы СКР. Установа ўважае яго датычным да арганізацыі няўдалага замаху на малдаўскага і расейскага прадпрымальніка Рэната Вусатага. 25 чэрвеня міністр унутраных спраў Малдовы Андрэй Нэстасэ заявіў, што звернецца ў міжнародныя следчыя органы па дапамогу ў расследаванні ў дачыненні да Плахатнюка. Матэрыялы, звязаныя з махлярствам і адмываннем грошай праз малдаўскія банкі, запытаныя ў тым ліку ў ФБР ЗША.