Навукоўцы выявілі двайніка Зямлі

На планеце можа быць жыццё.

Астраномы з дапамогай тэлескопа NASA TESS, сканструяванага спецыяльна для пошуку экзапланет, выявілі тры новыя аб'екты, якія круцяцца вакол карліка M-тыпу, вядомага як GJ 357. Пра гэта стала вядома на навуковай канферэнцыі, якая цяпер праходзіць у Масачусецкім тэхналагічным інстытуце, піша Scitechdaily .com (пераклад - rbc.ua).

Паведамляецца, што гэта найбліжэйшая планетная сістэма, выяўленая навукоўцамі, на якой можа быць жыццё.

Адна з адкрытых экзапланет (якія знаходзяцца па-за Сонечнай сістэмай. - Рэд.) асабліва зацікавіла навукоўцаў, бо ўяўляе сабой «суперзямлю» з вадкай вадой на паверхні. Даследчыкі дапускаюць вялікую імавернасць існавання жыцця на планеце, якую назвалі GJ 357 d.

Вядома, што двайнік Зямлі знаходзіцца ўсяго ў 31 светлавым годзе ад нас у сузор'і Гідры. Акрамя таго, GJ 357 d размешчаная ў «зоне Златаўласкі» (зона заселенасці. - Рэд.) сваёй зоркі - у гэтым рэгіёне тэмпература можа падтрымліваць ваду ў вадкім стане.

Адзначаецца, што экзапланета нашмат бліжэй да сваёй зоркі, чым Зямля да Сонца, і год на ёй доўжыцца ўсяго 55,7 дня.

GJ 357 d размешчаная ў вонкавым краі «заселенай зоны», дзе яна атрымлівае прыкладна такую ж колькасць цяпла, як Марс ад Сонца. Але навукоўцы дапускаюць - калі на планеце дастаткова шчыльная атмасфера, яна можа ўтрымліваць цяпло для падагрэву вадкай вады на яе паверхні.

На гэтым этапе астраномы праводзяць дадатковыя даследаванні, каб зразумець склад атмасферы планеты.