Стала вядома, хто будзе кіраваць «Арэна-Сіці»

Неўзабаве сетка ProStore можа сысці ў гісторыю.

Банкі, якім апошнім часам належалі гандлёвыя цэнтры, дзе размяшчаліся гіпермаркеты, створаныя Юрыем Чыжом і ягонымі партнёрамі, сталі шукаць больш платаздольных арандатараў і гаспадароў. Як атрымалася высветліць tut.by, асноўны прэтэндэнт на месца «Прастор» - сетка Green.

Нагадаем, падчас крызісу 2014-2015 года ProStore быў вымушаны перадаць гандлёвыя цэнтры ў Менску банкам паводле дамовы зваротнага лізінгу. Гэта значыць кампанія Чыжа планавала выкупіць аб'екты па зацверджаным графіку плацяжоў. Такім чынам «Арэна-Сіці» на праспекце Пераможцаў адышла Белаграпрамбанку, ProStore ў Каменнай Горцы і ў Малінаўцы - БПС-Ашчадбанку, гандлёвыя цэнтры ў Чыжоўцы і Шабанах - Беларусбанку. Мінулай вясной кіроўная кампанія «Прастора» задумала рэструктурызацыю бізнэсу. Гэта адбылося на фоне пытанняў аплаты аблігацый. Мінфін нават быў вымушаны прыпыніць іх абарачэнне.

Першым паведаміў аб змене арандатара АСБ Лізінг, «дачка» Беларусбанка, якая з'яўляецца ўладальнікам гандлёвага цэнтра на пр Партызанскі, 182. Кампанія ўклала дамовы арэнды на гэты аб'ект з кіроўнай структурай сеткі Green. Неўзабаве стала вядома, што банк аддаў перавагу гэтай сетцы і ў гандлёвым цэнтры на вуліцы Убарэвіча ў Чыжоўцы. Хоць раней паведамлялася, што «атрыманая прынцыповая згода» ад «Тытунь-Інвест» (сетка «Карона»).

Нядаўна змяніў уласніка і гандлёва-забаўляльны комплекс «Арэна-Сіці». Уладальнікам стала кампанія «Парагіс». Як удалося высветліць, новыя гаспадары маюць досвед вядзення бізнэсу ў сферы будаўніцтва і раздробнага гандлю. Яны кіруюць бізнэс-цэнтрамі Kiroff і CENTROPOL, якія базуюцца побач са стадыёнам «Дынама».

Заснавальнікам групы кампаній з'яўляецца Андрэй Шыхлін. Раней ён быў больш вядомы як прадавец моднага адзення. Шыхлін адкрыў у Менску франчайзінгавыя буцікі MaxMara, Armani Collezioni і TWINSET. Ён таксама з'яўляецца намеснікам старшыні Беларускай федэрацыі панкратыёна і змешаных баявых адзінаборстваў. У кіроўны склад гэтага грамадскага аб'яднання ўваходзяць вядомыя ў свеце бізнэсу і спорту людзі: Аляксей Саўчук і Міхаіл Маеўскі.

«Цікавасць да «Арэне-Сіці» з'явілася праз удалую лакацыю комплексу. Акрамя таго, мы мяркуем, што аб'ект мае добры патэнцыял», - сказалі ў кампаніі «Парагіс».

У планах кампаніі - прыцягнуць у «Арэна-Сіці» «новых арандатараў, падвысіць трафік і прывабнасць для пакупнікоў». Новая маркетынгавая стратэгія будзе накіравана на «пашырэнне ахопу і мэтавай аўдыторыі». Аднак першапачатковая задача ўсё ж «прывесці будынак у парадак».

Пагадненні з цяперашнімі арандатарамі працягваюць дзейнічаць. «Арандатары мелі права выбару, большасць прынялі пастанову застацца. Але гэта не выключае змены ў іх складзе і лакацыі, функцыянальнага занавання пасля мадэрнізацыі», - адзначылі ў «Парагіс».

Што да якарнага гіпермаркета, то вядуцца перамовы з сеткай Green, пацвердзілі гэтую інфармацыю ў «Парагіс».

Зрэшты, трыма «Прасторамі» гісторыя змены ўласніка не заканчваецца. Як высветліў tut.by, БПС-Сбербанк таксама шукае новых гаспадароў для аб'ектаў у Малінаўцы і Каменнай Горцы. «Банк вядзе перамовы і неўзабаве можа закрыць угоду. Магчыма, новым гаспадаром стане хтосьці з буйных рытэйлераў, якія раней выяўлялі цікавасць да іншых гіпермаркетаў «Прастор», - сказала крыніца, знаёмая з ходам перамоў.

«Цяпер ідзе працэс перадачы двух аб'ектаў [сеткі «Прастор»]. Што да астатніх [«Прастор»], то Green разглядае іх нароўні з іншымі гандлёвымі цэнтрамі ў якасці аб'ектаў для развіцця сеткі», - заявілі ў кампаніі «Грынрозніца».