У Расеі навуковец з Удмуртыі спаліў сябе на знак пратэсту супраць русіфікацыі
14- 10.09.2019, 14:20
- 24,809
Яму было 79 гадоў.
У расейскім Іжэўску ля будынка Дзяржаўнага савета Удмуртыі навуковец Альберт Разін у аўторак раніцай падпаліў сябе. Ён патрабаваў абараніць удмуртскі этнас. Побач з Разіным знойдзеныя плакаты, на адным з якіх напісана: «І калі заўтра мая мова знікне, то я гатовы сёння памерці». Пра гэта паведамляе сайт Idel.Реалии.
Сёння ў Іжэўску павінна была прайсці сесія Дзяржсавета. Як паведамляе «Дзелавы квадрат», пасяджэнне перанесенае на 24 верасня.
Праз некалькі гадзін пасля здарэння Разін памёр у лякарні. Яму было 79 гадоў. Ён - кандыдат філасофскіх навук, дацэнт, заслужаны дзеяч навукі Удмуртыі, актыўны ўдзельнік нацыянальнага руху «Удмуртыя Кенеша» і клуба навукоўцаў «Тадасчы».
Разін быў адным з навукоўцаў, якія ўлетку мінулага года звярнуліся з адкрытым лістом да старшыні Дзяржсавета Удмуртыі Аляксея Прасолава і дэпутатаў з патрабаваннем не падтрымліваць законапраект аб скасаванні абавязковага вывучэння моў карэнных народаў Расеі ў сярэдніх школах, накіраваны Дзяржаўнай думай для ацэнкі ў рэгіёны.