Венядзіктаў: Каля Пуціна ідзе барацьба за ўладу

Унутры палітычнай эліты РФ раскол.

У асяроддзі прэзідэнта Расеі Уладзіміра Пуціна ідзе барацьба за ўладу. Такім меркаваннем падзяліўся галоўны рэдактар «Эхо Москвы» Аляксей Венядзіктаў у эфіры RTVI.

На думку галоўрэда «Эхо Москвы», пра раскол унутры палітычнай эліты краіны сведчыць нядаўні каментар кіраўніка «Ростэха» пра выбары ў Масгардуму. «Што такое здарылася, каб Сяргей Віктаравіч Чэмезаў, чалавек вельмі асцярожны і моцна блізкі да Пуціна, прыняў пастанову не ў кабінеце яму гэта сказаць, а сказаць у інтэрв'ю. Гэта азначае, што ў пэўных кропках кіпенне дайшло, гэта значыць ідзе барацьба за ўладу. Пакуль каля Пуціна», – сказаў Венядзіктаў.

Ён таксама адзначыў, што прэзідэнт РФ прыслухоўваецца да меркавання «мабілізацыйнай партыі», куды могуць уваходзіць Патрушаў, Кавальчук, Сечын і Валодзін. Але ёсць і другая група, з якой таксама трэба размаўляць. «Ігнараваць людзей, якія прайшлі з ім ад Дрэздэна да Крамля – ён не можа, таму што ён разумее, што Чэмезава нельга падкупіць і Сабяніна нельга падкупіць, калі яны прыходзяць з процілеглымі пунктамі гледжання. Значыць нешта там не так», – заўважыў галоўрэд «Эхо Москвы».

У жніўні кіраўнік дзяржкарпарацыі «Ростэх» Сяргей Чэмезаў на пытанне РБК пра пратэставыя акцыі ў Маскве адказаў, што «наяўнасць разумнай апазіцыі ідзе на карысць любому органу, прадстаўнічаму сходу і ў канчатковым рахунку дзяржаве». А адсутнасць такой апазіцыі рана ці позна прывядзе да часоў застою, заўважыў ён.

З канца ліпеня ў Маскве праходзяць пратэсты ў падтрымку незарэгістраваных кандыдатаў на выбары ў гарадскую Думу. Прычынай адмовы ў рэгістрацыі Масдзяржвыбаркам назваў брак у подпісах.