Пратэстоўцы ў Ганконгу папрасілі брытанскае грамадзянства

Дзясяткі тысяч пратэстоўцаў зноў выйшлі на вуліцы Ганконга.

Нягледзячы на забарону на дэманстрацыі, у Ганконгу ў нядзелю, 15 верасня, на вуліцы зноў выйшлі дзясяткі тысяч пратэстоўцаў. Некаторыя актывісты пачалі кідаць у паліцэйскіх камяні і бутэлькі з запальнай сумессю, паведамляе агенцтва AFP. У адказ тыя ўжылі слёзатачывы газ і вадамёты, каб разагнаць дэманстрантаў, піша «Немецкая волна».

Некалькі сотняў пратэстоўцаў таксама правялі мітынг перад консульствам Вялікабрытаніі, пад чыёй юрысдыкцыяй Ганконг знаходзіўся да 1997 года. Дэманстранты, што спяваюць брытанскі гімн, прасілі брытанскі ўрад пра падтрымку, а таксама абвінавацілі Лондан у недастатковым ціску на Пекін.

Між іншым, актывісты патрабавалі даць жыхарам Ганконга брытанскае грамадзянства. Да 1 ліпеня 1997 г. тэрыторыя належала Вялікабрытаніі і ўсе, хто нарадзіўся тут да гэтай даты, маюць права атрымаць статус брытанскага грамадзяніна за мяжой. Такі пашпарт дазваляе без візы ўязджаць у былую метраполію, але не прыраўноўваецца да грамадзянства. Між іншым, дакумент не дае яго ўладальніку права пастаянна пражываць у Вялікабрытаніі ці працаваць у гэтай краіне. У сваю чаргу, апошні брытанскі губернатар Ганконга Крыс Патэн выказаўся за тое, каб зняць падобныя абмежаванні.

Масавыя пратэсты праз планы ўладаў дазволіць экстрадыцыю ў Кітай

З чэрвеня ў Ганконгу праходзяць шматтысячныя акцыі пратэсту, удзельнікі якіх першапачаткова выступалі супраць планаў урада дазволіць выдачу меркаваных правапарушальнікаў уладам Кітая. Пазней яны сталі патрабаваць правядзення дэмакратычных рэформаў, увядзення ўсеагульнага выбарчага права і адстаўкі кіраўніка адміністрацыі Ганконга Кэры Лам. Акрамя таго, дэманстранты заклікаюць да незалежнага расследавання выпадкаў паліцэйскага гвалту на ранейшых акцыях.

Спецыяльны адміністрацыйны раён Ганконг з'яўляецца часткай Кітая з 1997 года. Да 2047 года Ганконгу гарантаваныя шырокія спецыяльныя правы, сярод якіх - свабода прэсы, сходаў і выказвання меркаванняў.

У пачатку верасня Кэры Лам паабяцала афіцыйна зняць з разгляду законапраект аб выдачы меркаваных злачынцаў уладам КНР. Аднак самыя масавыя пратэсты ў Ганконгу з часу перадачы гэтай былой брытанскай калоніі Кітаю не сціхаюць і пасля звароту кіраўніка адміністрацыі.