«Школа перагружаная - як настаўнікам не зрывацца?»

Праблемы ў гомельскай школе №15 пачаліся задоўга да скандалу, «які ўславіў» яе на ўсю краіну.

«Тут дзіця вінаваты, тут настаўнік, тут дырэктар. Дзяржава «замазвае» сутнасць праблемы замест таго, каб яе вырашаць», - абураюцца жыхары мікрараёна Хутар у Гомелі, якія сабраліся. Яны ўпэўненыя, што скандалу ў школе №15 магло не адбыцца, калі б школа не была перагружаная. Бо яшчэ 10 гадоў таму людзям абяцалі пабудаваць новую школу, але планы так і засталіся на паперы, піша tut.by.

Мікрараён Хутар - тыповы прыклад «каменных джунгляў» у беларускім горадзе: гэтыя гомельскія шматпавярхоўкі выраслі ў чыстым полі і працягваюць расці - а школа на ўсю акругу ўсяго адна. Тая самая - №15.

- Наша школа перагружаная, і з кожным годам першых класаў у ёй становіцца ўсё больш. У мінулым годзе восем, у гэтым - дзевяць. Школа разлічаная на 800 дзяцей, а ходзіць у яе 1800, у класах па 30 чалавек. Як тут настаўнікам не зрывацца? - кажуць жыхары.

Яшчэ 8 верасня жыхары мікрараёна «Хутар» стварылі петыцыю, у якой патрабавалі пабудаваць ім новую школу наўзамен перапоўненай. 12 верасня гомельская школа №15 стала вядомая на ўсю краіну: там адбыўся скандальны канфлікт паміж настаўнікам і вучнем, які трапіў на відэа.

Педагогі школы, абараняючы звольненую пасля скандалу дырэктарку Марыну Чарненку, звязвалі сітуацыю, якая склалася ў школе ў тым ліку і з перапоўненасцю навучальнай установы:

- Школа перагружаная. На 800 месцаў - 1800 вучняў. Уяўляеце, якая нагрузка на дырэктара? Няма ні сталоў, ні абсталявання. А яна столькі рабіла, каб дзеці хадзілі блізка, ахвочых жа ў школу трапіць шмат.

Звольненая дырэктарка, успамінаюць і педагогі, і мясцовыя жыхары, спрабавала вырашаць праблему: школа нават арандавала некалькі класаў у суседнім будынку дзіцячага дома. Але і гэта не дапамагала.

Большая частка сем'яў, якія пасяліліся тут, маюць па трое і больш дзяцей. І цяпер здзіўляюцца, як можна было будаваць раён для шматдзетных - але не пабудаваць пры гэтым школу.

- Людзі сюды з трыма дзецьмі прыязджалі, а зараз у іх і чацвёра, і пяцёра дзяцей. Усім абяцалі, што вось-вось у мікрараёне пабудуюць і сад, школу. А потым пра свае абяцанні забыліся, - расказваюць жыхары.

- У 2014 годзе мы прыходзілі ў УКБ купляць кватэры, і нам казалі, што насупраць нашага дома будзе школа, побач сад, стадыён. Але ўжо старэйшы скончыў школу - а мы з акна ўсе любуемся на гэтую пустэчу, - кажа Ірына.

Пустка, на якой 10 гадоў таму абяцалі пабудаваць школу. Тыя, што не патрапілі ў школу №15 вучні ездзяць у школу №41 (гэта 6-8 прыпынкаў грамадскім транспартам), астатнія дзеці вымушаныя наведваць установы адукацыі суседніх раёнаў.

- Я наогул ваджу кожны дзень дзяцей у [мікрараён] Заходні. А 5.42 у нас першы аўтобус. Уяўляеце, у колькі нам трэба ўстаць? Пазней выходзіць з дому нельга, інакш я на працу не паспею, - кажа шматдзетны бацька.

- Мне ў сад дзіцяці завесці, потым другое дзіця ў школу - гэта 7 прыпынкаў, а на працу наогул у іншы бок - і так кожны дзень, - скардзіцца іншая шматдзетная мама.

Са слоў жыхароў, яны не раз хадзілі на прыём у адміністрацыю Навабеліцкага раёна, звярталіся ў гарвыканкам. Але адказ адзін - у бюджэце грошай няма.

- На прыбіральні на набярэжнай грошы ёсць, а на школу - не. Прэзідэнт просіць нараджаць - і мы план дзяржаве выконваем, дык чаму дзяржава не выконвае свой? - абураныя жыхары мікрараёна.

У праекце забудовы мікрараёнаў №94 і 96 (Хутар) Гомеля значацца тры дзіцячыя садкі, тры школы, паліклініка і нават кінатэатр. Але пакуль у жыхароў ёсць толькі крама і пошта. Атрымаць каментар адносна планаў будаўніцтва новай школы ў мікрараёне Хутар у адміністрацыі Навабеліцкага раёна не атрымалася: яго, са слоў прадстаўнікоў адміністрацыі, маглі б даць начальнік упраўлення адукацыі і намеснік кіраўніка адміністрацыі, а іх звольнілі пасля скандалу.

Яшчэ ў 2016 годзе намеснік начальніка ўпраўлення архітэктуры і горадабудаўніцтва Гомельскага гарвыканкама Кірыл Гапееў казаў мясцовым жыхарам:

- Праектам дэталёвай планіроўкі і забудовы мікрараёнаў 94 і 96, у тым ліку Хутар, прадугледжанае будаўніцтва дзіцячых садоў і школ. Яны будуць пабудаваны, як толькі на іх выдзеляць фінансаванне.