У Менску пачынаюць зразаць кандыцыянеры і спадарожнікавыя антэны
71- 3.09.2019, 20:40
- 100,908
Гэта закране ўсе дамы сталіцы.
Абураны гэтым фактам жыхар дома ў Масюкоўшчыне напісаў у рэдакцыю kp.by:
- Што значыць «самавольна ўсталяванае»? Я ж не сам талерку прыкруціў, а заключыў дамову з фірмай, якая легальна ўсталёўвае спадарожнікавае абсталяванне. Яна мае сайт у інтэрнэце, ліцэнзію і плаціць падаткі. Хай з іх і пытаюцца тады, чаму павесілі без дазволу ўладаў. І наогул: а калі ў мяне талерка не на фасадзе дома замацаваная, а знаходзіцца на балконе? Гэта як лічыцца? Балкон - частка маёй кватэры, а ў ёй што хачу, то і ўсталёўваю. А то сушылкі для бялізны і жахлівыя лоджыі нікому не перашкаджаюць, а мая талерка супакою не дае».
Пад раздачу трапяць усе дамы сталіцы
Інфармацыя, што ў Менску будуць масава зразаць кандыцыянеры і спадарожнікавыя антэны, першы раз з'явілася некалькі гадоў таму. Але тады, пад раздачу патрапілі толькі дамы ў цэнтры горада і тыя, што прызнаныя гісторыка-культурнай каштоўнасцю. Улады палічылі, што некаторыя канструкцыі на фасадах не ўпісваюцца ў аблічча горада і могуць быць небяспечныя для людзей.
Нагода для цяперашняй праверкі засталася той жа, вось толькі ў зоне рызыкі цяпер аказаліся ўсе шматкватэрныя дамы сталіцы.
- Некаторыя ТВ-антэны вельмі старажытныя, іржавыя. Колькі яны яшчэ пратрымаюцца? А калі снегу наваліцца і яны не вытрымаюць дадатковай нагрузкі і абрынуцца? На такія канструкцыі адміністрацыя раёна дакладна даваць дазвол не будзе. Усё астатняе - вельмі індывідуальна, - кажа майстарка камунальнай службы Кастрычніцкага раёна Таццяна Шаўчэнка.
Толькі без панікі
У ЖЭСе №57 запэўніваюць: насельніцтву не варта хвалявацца. Дэмантаж абсталявання пагражае толькі ў самым крайнім выпадку і толькі пасля пастановы суда.
- У жыхароў на руках павінен быць дазваляльны дакумент на ўстаноўленыя антэны, спадарожнікавую талерку або кандыцыянер. Яго і трэба будзе падаць супрацоўніку камунальнай службы. Яго можна атрымаць у службе «Адно акно» цалкам бясплатна. Калі дазволу не будзе, уладальніку кватэры выпішуць прадпісанне. Не выканалі - тады ў сітуацыю ўмяшаецца суд, - распавядае спецыяліст.
Самавольная ўстаноўка талеркі прыраўноўваецца да перапланіроўкі
Самавольнае ўсталяванне на дахах і фасадах шматкватэрных жылых дамоў індывідуальных антэн і іншых канструкцый забараняе пастанова Саўміна №399 ад 2013/05/13 года. Каб ваш кандыцыянер або ТВ-талерка не аказаліся ў спісе «самавольна усталяваных», вам трэба загадзя звярнуцца ў службу «Адно акно» адміністрацыі раёна і напісаць заяву паводле адміністрацыйнай працэдуры 1.1.21-1.