Супрацоўнік American Airlines трапіўся на псаванні самалёта перад вылетам

Механік хацеў дамагчыся дадатковай платы за звышурочную працу.

Суд прад'явіў механіку, які працаваў у авіякампаніі American Airlines, абвінавачванні ў спробе сапсаваць навігацыйнае абсталяванне пасажырскага самалёта. Пра гэта паведамляе РБК са спасылкай на тэлекампанію ABC.

Згодна з матэрыяламі справы, у ходзе допыту механік Абдул-Маджыд Маруф Ахмед Алані прызнаўся, што справакаваў пашкоджанне ў працы бартавога абсталявання самалёта перад вылетам. Паводле словаў Алані, ён быў засмучаны праз доўгія перамовы паміж авіякампаніяй і прафесійным звязам і хацеў атрымаць дадатковую плату за звышурочную працу ў папраўцы самалёта.

Інцыдэнт адбыўся 17 ліпеня. Незадоўга да ўзлёту пілот самалёта, які павінен быў выконваць рэйс з Маямі на Багамы, выявіў непаладкі ў сістэме, якая кантралюе хуткасць і іншыя важныя для палёту параметры, і пастанавіў скасаваць палёт. На борце знаходзіліся 150 пасажыраў. Падчас агляду самалёта спецыялісты выявілі кавалак пластыку ў навігацыйным блоку.

Згодна з запісам камераў назірання, чалавек, пазней апазнаны ягонымі калегамі як Алан, знаходзіўся на борце самалёта цягам сямі хвілінаў. На допыце механік прызнаў віну. Алані працаваў у American Airlines з 1988 года, але быў адхілены пасля інцыдэнту.

Як паведамілі ABC прадстаўнікі American Airlines, пасля інцыдэнту ўсе сістэмы самалёта былі адрамантаваныя.