Пастаўкі расейскага вугалю ва Украіну выраслі ў тры разы

Кіеў ставіць перад сабой задачу скараціць аб'ёмы імпарту.

З пачатку 2019 года адставанне расейскага экспарту вугалю ва Украіну ў параўнанні з 2018 годам складала 1 млн т.

Пастаўкі расейскага вугалю ва Украіну, якія з чэрвеня ідуць толькі праз спецыяльныя дазволы, у ліпені выраслі ў тры разы, да 400 тыс. т, у параўнанні з папярэднім месяцам на фоне росту адгрузак буйных экспарцёраў. Пра гэта паведамляе «Камерсант».

У той самы час, адгрузкі ў ліпені на 50% ніжэйшыя, чым у 2018 годзе, а ў цэлым з пачатку года адставанне экспарту ў параўнанні з 2018 годам складала 1 млн т.

«Аналітыкі кажуць, што зніжэнне паставак расейскага вугалю ўплывае на ўкраінскую металургію, якая скараціла вытворчасць коксу і з прычыны гэтага выплаўленне сталі і чыгуну», – піша выданне.

Асноўнымі расейскімі экспарцёрамі ў ліпені былі Рэсурс (101,3 тыс. т), шахтакіраванне Садкінскае (66 тыс. т), Распадская (49,82 тыс. т). Кузбасразрэзвугаль, які з'яўляўся адным з найбуйнейшых пастаўшчыкоў да ўводу новых правілаў экспарту, але прыпыніў адгрузку ў чэрвені, накіраваў першую партыю аб'ёмам 36,3 тыс. т. Сібантрацыт таксама адгрузіў першую з чэрвеня партыю аб'ёмам 10,5 тыс. т.

Суразмоўцы выдання сярод вугальных кампаній РФ адмаўляюцца казаць пра тое, як працуе механізм узгаднення заявак на пастаўкі вугалю ва Украіну. «Прычыны палітычныя, ёсць задача скараціць аб'ёмы. Эканамічных прычынаў шукаць не варта», – заявіў адзін з суразмоўцаў. У мінэканомікі РФ не каментуюць пытанні ўкраінскага экспарту.