20 лютага 2020, Чацвер, 2:53
Засталося зусім крыху
Рубрыкі

«Муж наступіў на ўрослую ў зямлю бляшанку»

18
«Муж наступіў на ўрослую ў зямлю бляшанку»
ІЛЮСТРАЦЫЙНАЕ ФОТА: ВОЛЬГА ШУКАЙЛА

Падрабязнасці трагедыі ў Баранавічах, дзе адбыўся выбух.

У чацвер удзень у адным з двароў вуліцы Лебядзінае ў Баранавічах адбыўся выбух. Пацярпелі тры чалавекі. Аднаму з мужчын адарвала ногі. Са слоў яго жонкі Марыі (на просьбу жанчыны імёны змененыя), муж цяпер знаходзіцца ў Менску ў вайсковым шпіталі. Дактары працягваюць змагацца за яго жыццё, піша tut.by.

ФОТА: БАРАНАВІЦКАГА ГРАНС

Вуліца Лебядзіная - гэта прыватны сектар. Сям'я Марыі пераехала сюды гадоў дзесяць таму. У іх двое маленькіх сыноў. Мужчына, у двары якога адбыўся выбух, іх сусед.

- Сам сусед - пенсіянер. На ўчастку ён не жыве, але часта бывае. Тут у яго гараж, агарод, - распавядае жанчына. - Перыядычна па гаспадарцы яму дапамагае працаўнік. Гэты працаўнік стаў трэцім пацярпелым.

Падчас трагедыі Марыя была на працы. Яе муж, распавядае, забраў сына са школы, звазіў у паліклініку, схадзіў у краму. Потым сказаў дзіцяці: «Сына, схаджу на паўгадзінкі да суседа пабалбачу».

- У двары ў суседа муж наступіў на нейкую ўрослую ў зямлю бляшанку - і адбыўся моцны выбух, - ледзь стрымлівае слёзы жанчына. - Як распавядаюць, гэтая бляшанка там ужо гады два ляжала. Дакладна, што гэта за прадмет, я не скажу... Нейкая круглая жалязяка. Наколькі я ведаю, сусед з гэтым працоўным ездзяць збіраць металалом, а потым здаюць яго. На ўчастку там шмат усяго валяецца.

ФОТА: ТЭЛЕГРАМ-КАНАЛ СК

Пра тое, што здарылася бяда, Марыя даведалася ад лекараў. У Баранавічах яе мужа прааперавалі, а потым павезлі ў Менск, у вайсковы шпіталь.

- Мужу 40 гадоў, ногі не выратавалі. Стан, сказалі мне лекары, вельмі цяжкі. Ён страціў шмат крыві, - з цяжкасцю гаворыць суразмоўніца. - У суседа ранкі, у рабочага - пераломы. Яны, наколькі я ведаю, у Баранавічах у бальніцы.

Усю ноч, кажа Марыя, у двары суседа дзяжурыла міліцыя. У пятніцу з раніцы тут працягваюць працаваць людзі ў пагонах. Тэрыторыю даследавалі сапёры, на месцы выяўлена два набоі часоў Вялікай Айчыннай вайны.

СК у тэлеграм-канале паведаміў: выбух адбыўся пасля таго, як адзін з мужчын ударыў нагой металічны прадмет, які ляжаў на ўчастку. Адзін са знойдзеных набояў сапёры ўжо знішчылі, другі абясшкодзілі і перадалі для экспертызы. Паводле гэтага факту Баранавіцкім МАСК распачатая крымінальная справа паводле ч.2 арт. 295 Крымінальнага кодэкса.