У Іраку аднавіліся антыўрадавыя пратэсты

Дэманстранты мяркуюць, што прэм'ер-міністр Махдзі не выканаў свае абяцанні.

Дзясяткі іракскіх дэманстрантаў у Багдадзе і іншых гарадах краіны былі параненыя ў панядзелак у выніку сутыкненняў з сіламі бяспекі, якія спрабавалі расчысціць заблакаваныя дарогі. Пра гэта паведамілі крыніцы ў сілавых структурах і органах аховы здароўя, падае інфармацыю «Голас Амерыкі».

Антыўрадавыя хваляванні аднавіліся пасля зацішша, якое прадаўжалася некалькі тыдняў.

Мінулай ноччу дэманстранты на плошчы Таяран кідалі бутэлькі з запальнай сумессю і камяні ў паліцыянтаў, якія ў адказ ужывалі слезацечны газ і светлашумавыя гранаты, паведамілі Reuters відавочцы.

У іншых гарадах на поўдні Ірака, уключаючы Насірыю, Кербалу і Амару, сотні дэманстрантаў падпальвалі пакрышкі і блакавалі асноўныя дарогі. Яны заяўляюць, што прэм'ер-міністр Адэль Абдэль Махдзі не выканаў сваіх абяцанняў, уключаючы фармаванне новага ўрада, падсправаздачнага іракцам.

«[Сілы бяспекі] павінны спыніць страляць і цэліцца. Хто яны, і хто мы? Абодва бакі - гэта іракцы. Дык чаму вы забіваеце сваіх братоў?» - гаварыла адна ўдзельніца акцыі пратэсту ў Багдадзе, якая адмовілася паведаміць сваё імя.

Паліцыя Багдаду паведаміла, што яе супрацоўнікі паспяхова аднавілі рух па дарогах, заблакаваныя праз «агрэсіўныя сходы».

Масавыя пратэсты адбываюцца ў Іраку з 1 кастрычніка. Большасць іх удзельнікаў - гэта моладзь, якая патрабуе рэформы палітычнай сістэмы, якая, на іх думку, цалкам карумпаваная і не дазваляе большасці іракцаў выбрацца з галечы.

Падчас пратэстаў было забіта больш за 450 чалавек.

Колькасць удзельнікаў скарацілася, але пратэсты аднавіліся на мінулым тыдні, калі дэманстранты паспрабавалі скарыстацца момантам у сувязі з прыцягненнем увагі да пагрозы амерыкана-іранскага канфлікту, пасля таго як ЗША забілі высокапастаўленага іранскага генерала на тэрыторыі Ірака.

Забойства Касэма Сулеймана, на якое Тэгеран адказаў ракетным ударам па дзвюх іракскіх вайсковых базах, падкрэсліла ўплыў некаторых замежных дзяржаў у Іраку, асабліва Ірана і ЗША.