Беларусы будуць па-новаму атрымліваць і адпраўляць лісты і пасылкі

Што змянілася з 17 студзеня?

У Беларусі з 17 студзеня ўвялі змены ў правілы надання паслуг паштовай сувязі агульнага карыстання. Яны прадугледжаныя пастановай Саўміна №16 ад 14 студзеня гэтага года.

Партал tut.by паглядзеў, якія змены прынялі ўлады.

Пра перасылку ў лістах валюты

Пастанову ўрада дапоўнілі пунктам, паводле якога перасылка фізічнымі асобамі замежнай валюты (а таксама аплатных дакументаў і каштоўных папер у замежнай валюце) за межы Беларусі дапускаецца ў лістах з абвешчанай каштоўнасцю, калі ў краіне прызначэння надаецца гэтая паслуга.

Пра абанементныя паштовыя скрыні

Некаторыя новаўвядзенні тычацца абанементных паштовых скрынь. Улады, да прыкладу, канкрэтызавалі, якія адпраўленні могуць прыходзіць на такія скрыні, - простых паштовых картак, лістоў, бандэроляў, дробных пакетаў, прэсы, паведамленняў на паштовыя адпраўленні, якія з улікам іх памераў могуць быць змешчаныя ў іх. Раней былі толькі прапісаныя паштовыя адпраўленні і прэса.

У пастанове Саўміна таксама прапісалі, што прэса, якая прыйдзе на такую паштовую скрыню ўжо пасля адмовы ад яе карыстання (пры ўмове, што не аформленая паслуга пераадрасаваная на новы паштовы адрас), будзе захоўвацца да запатрабавання ў аб'екце паштовай сувязі да 30 каляндарных дзён. Раней гэты момант не быў прапісаны.

Улады таксама прапісалі, што для адпраўкі і атрымання паштовых адпраўленняў (акрамя спецыяльных адпраўленняў і паштовых грашовых пералічэнняў) аператар паштовай сувязі можа ўсталёўваць паштаматы. «Карыстальнiкi паслуг паштовай сувязi маюць права атрымаць у часовае карыстанне за пэўную плату (абанент) вочка паштамата ў парадку, вызначаным аператарам паштовай сувязі», - гаворыцца ў пастанове Саўміна.

З'явілася гібрыдная карэспандэнцыя

Улады прапісалі новы тып адпраўлення пісьмовай карэспандэнцыі - гібрыднае адпраўленне. Яно «дае магчымасць карыстальнікам паслуг паштовай сувязі адпраўляць і атрымліваць паштовыя адпраўленні, найбольшая частка перасылкі якіх ажыццяўляецца ў электронным выглядзе», удакладнілі ў міністэрстве сувязі і інфарматызацыі.

Адсочванне дастаўкі міжнародных лістоў

«Карыстачам паслуг паштовай сувязі надаецца магчымасць адпраўляць міжнародныя адпраўленні пісьмовай карэспандэнцыі з паслугай «дастаўка з адсочваннем», - адзначаюць у міністэрстве сувязі і інфарматызацыі. Раней з 1 лютага 2018 года такая магчымасць была для прыярытэтных міжнародных адпраўленняў пісьмовай карэспандэнцыі.

Падрабязна прапісалі, якія пасылкі належаць да далікатных, а якія да грувасткіх

Улады падрабязна прапісалі, якія пасылкі разглядаюцца як далікатныя, грувасткія і цяжкавагавыя. Ад выгляду пасылкі залежыць кошт яе адпраўкі. За далікатныя дробныя пакеты, далікатныя і грувасткія ўнутраныя адпраўленні паскоранай пошты, далікатныя і грувасткія ўнутраныя пасылкі, грувасткія міжнародныя пасылкі спаганяецца дадатковая плата. Калі ўнутраныя адпраўленні паскоранай пошты ці пасылкі з'яўляюцца адначасова далікатнымі і грувасткімі, то дадатковая плата спаганяецца аднаразова.

Да прыкладу, цяпер з'явілася ўдакладненне, што міжнароднай грувасткай пасылкай уважаецца тая, вага якой ад 20 да 50 кілаграмаў і якая па сваёй форме (структуры) не можа лёгка грузіцца разам з іншымі паштовымі адпраўлення. Таксама з'явілася ўдакладненне, што далікатныя і грувасткія міжнародныя пасылкі прымаюцца толькі ў тыя краіны, якія дапускаюць гэтыя адпраўленні да перасылкі (раней гаварылася толькі пра грувасткія).

«Адпаведна з практыкай праваўжывання і ў адпаведнасці з актамі Сусветнага паштовага саюза вызначаюцца тыпы паштовых адпраўленняў, якія з'яўляюцца далікатнымі, грувасткімі і цяжкавагавымі», - удакладнілі ў прэс-службе міністэрства сувязі і інфарматызацыі.

Улады таксама прапісалі, што гранічная вага адпраўленняў паскоранай пошты і пасылак складае 50 кілаграмаў, як і пасылак, якія дастаўляюць кур'еры.

Як сваякам непаўналетняга атрымаць за яго пасылку або ліст

Улады таксама прапісалі, як сваякам адрасата (таго, каму даслалі ліст або пасылку) могуць атрымаць за яго паштовае адпраўленне. Гэта зрабілі для «паляпшэння якасці абслугоўвання карыстальнікаў паслуг паштовай сувязі». Так, законныя прадстаўнікі непаўналетняга (да прыкладу, бацькі) могуць у яго адсутнасць атрымаць без даверанасці за яго пасылку, калі пададуць адзін з дакументаў (у тым ліку пашпарт, пасведчанне кіроўцы, вайсковы білет) і «дакументы, якія пацвярджаюць сваяцтва або права законных прадстаўнікоў».