Эканаміст: Ад «мадэлі» Лукашэнкі засталіся рожкі ды ножкі

Як краіна перажыве пераход да сусветных коштаў на нафту?

З усяго відаць, беларускія ўлады рыхтуюцца да канца рэнтнай эканомікі. Як краіна перажыве пераход да сусветных коштаў на нафту?

Днямі Лукашэнка заявіў, што Беларусь будзе імкнуцца пастаўляць з расейскага рынку толькі 30–40% неабходных аб'ёмаў нафты, а астатняе браць у іншых дзяржаваў.

Як высветлілі СМІ, гэты мэтавы параметр вызначаны на 2024 год, калі расейская нафта будзе абыходзіцца Беларусі ўжо паводле сусветнага кошту.

Некаторыя эксперты мяркуюць, што гэтая сітуацыя можа азначаць канец рэнтнай эканомікі: да гэтага часу за кошт паставак таннай расейскай нафты і наступнага продажу атрыманых з яе нафтапрадуктаў беларуская дзяржава атрымлівала істотную частку прыбыткаў бюджэту.

Эканаміст Леў Марголін у каментары UDF.BY адзначыў, што разумее логіку беларускіх уладаў, якія хочуць скараціць пастаўкі нафты з Расеі.

«Раз кошт на расейскую нафту ў 2024 годзе стане рынкавым, то асаблівай розніцы не будзе, адкуль рабіць пастаўкі. Дастаўка з іншых краінаў будзе абыходзіцца крыху даражэй, але на гэта цалкам можна не зважаць. Калі кошт паўсюль рынкавы, то навошта Расеі даваць бонус у выглядзе закупкі вялікага аб'ёму (да 24 мільёнаў тонаў нафты за год), раз у Маскве больш не хочуць прапаноўваць ільготы?» – сказаў Марголін.

Што тычыцца становішча, у якім апынецца беларуская эканоміка пасля пераходу да рынкавых коштаў на нафту, то эканаміст мяркуе, што яно будзе няпростым.

«Цяжка будзе. Да прыкладу, экспарт нашага машынабудавання з кожным годам і так скарачаецца, а цяпер яно рызыкуе застацца яшчэ і без датацый. Відавочна, што краіне патрэбныя рэформы. Можа быць, калі-небудзь Лукашэнка (або хто прыйдзе яму на змену чалавек) саспее да iх правядзення. Інакш будзе вельмі цяжка. Беларуская эканоміка ўжо ў стагнацыі, і яна можа доўжыцца доўга – гадамі, нават дзесяцігоддзямі», – мяркуе Марголін.

Ці атрымаецца ва ўладаў захаваць цяперашнюю сацыяльную мадэль?

«Па-мойму, ад яе і так засталіся амаль рожкі ды ножкі. Ні аховы здароўя, ні адукацыі сацыяльнай дэ факта няма. І што засталося, будзе ўразацца», – адзначыў эканаміст.