Што вядомае аб магчымым затрыманні дырэктараў цукровых заводаў?

Улады маўчаць.

Што адбываецца ў цукровай галіне краіны — пакуль дакладна не ведае ніхто. Дырэктара аднаго з чатырох заводаў, відавочна, знялі з таго самага самалёта «Белавія» Менск-Мюнхен, які развярнулі над Вроцлавам і вярнулі ў Гародню. Астатніх трох кіраўнікоў у панядзелак раніцай на працоўных месцах не было. Афіцыйнай інфармацыі няма з аніводнай структуры: маўчаць СК, КДБ, памежны камітэт, «Белавія», піша tut.by.

Міхаіл Крыштаповіч, Гарадзейскі цукровы камбінат

Учора журналісты пісалі аб тым, што дырэктар Гарадзейскага цукровага камбіната Міхаіл Крыштаповіч затрыманы — прынамсі, пра гэта кажуць у пасёлку Гарадзеі. Са слоў мясцовых, у суботу на камбінаце быў ператрус, кабінет кіраўніка нібыта апячатаны.

У чацвер Крыштаповіч быў на рабоце, яго калегі бачылі, а ў пятніцу павінен быў паляцець у адпачынак.

- Афіцыйна Міхаіл Васільевіч знаходзіцца ў працоўным адпачынку да 4 лютага — удакладняюць у прыёмнай прадпрыемства.

63-гадовы Міхаіл Крыштаповіч узначальвае цукровы камбінат больш за 20 гадоў, усе нашы суразмоўцы адклікаюцца аб ім як аб пісьменным дырэктары.

Віктар Міронаў, Жабінкаўскі цукровы завод

Рабочыя на прахадной Жабінкаўскага завода на пытанні з нагоды свайго гендырэктара кажуць, што нічога пра яго затрыманне не чулі. На прадпрыемстве журналістам паведамілі, што дырэктара ў панядзелак на месцы не было. Аднак куды знік кіраўнік і калі вернецца, ніхто не ведае.

- Шчыра скажу, прыйшоў сёння раніцай і атрымаў «абухом па галаве». Не ведаў нічога. Я ў пятніцу быў у камандзіроўцы. Я толькі 4 месяцы працую на прадпрыемстве. Сёння сам быў у шоку — распавёў намеснік гендырэктара ў камерцыйных пытаннях ААТ «Жабінкаўскі цукровы завод» Раман Неберкаль.

- Гендырэктар не на месцы?

- Паняцця не маю. Сакратара спытайце.

Намеснік гендырэктара ў сацыяльных пытаннях Сяргей Папко таксама паведаміў, што не валодае афіцыйнай інфармацыяй з нагоды прычын адсутнасці на працоўным месцы начальніка.

- Я ведаю тое ж, што і вы, - адказаў Сяргей Міхайлавіч.

— А што вы ведаеце? На месцы Віктар Міронаў?

Міміка Сяргея Міхайлавіча дазваляе меркаваць, што ён ці то не ў курсе, дзе начальнік, ці то ў курсе — але не хоча пра гэта казаць.

- Ніхто мне ні з канцэрна, ні з праваахоўных органаў, ніадкуль не тэлефанаваў — кажа намеснік дырэктара.

- Так, а ў пятніцу ён быў на працы?

- Так, быў.

— Яго выклікалі або тут забралі?

- У пятніцу ён быў на працы.

- Ніхто нічога не ведае, а як вы збіраецеся цяпер працаваць?

- Заўтра прыедзе канцэрн [«Белдзяржхарчпрам»]. На кагосьці ўскладуць абавязкі кіраўніка і будзем працаваць.

У райвыканкаме таксама разводзяць рукамі на пытанні пра Віктара Міронава.

- Пакуль нічога не магу вам сказаць. Ніякай афіцыйнай інфармацыі ў нас няма, - паведаміў намеснік старшыні Жабінкаўскага райвыканкама Андрэй Кузьміч, які курыруе прамысловасць рэгіёну.

Хатні тэлефон Віктара Міронава не адказвае.

Мікалай Пруднік, Слуцкі цукрарафінадны камбінат

У прыёмнай Слуцкага цукровага камбіната паведамілі: дырэктар Мікалай Пруднік у адпачынку з пятніцы, 24 студзеня. Будзе адсутнічаць два тыдні.

- Пруднік у адпачынку, я выконваю абавязкі, ператрусу на заводзе не было, - кажа Валерый Налётаў, намеснік дырэктара Слуцкага цукровага камбіната.

На пытанне аб магчымым затрыманні кіраўніка ён адказаў, што ў іх няма такой інфармацыі.

- Яго [Мікалая Прудніка] на тэрыторыі Рэспублікі Беларусь няма, ён паляцеў у пятніцу з жонкай — распавядае Дзмітрый Паўлавіч, родны брат дырэктара Слуцкага цукровага камбіната.

Адказваць на пытанне аб магчымым затрыманні Мікалая Прудніка ён не стаў.

- Наша афіцыйная версія - дырэктар у адпачынку. Таму, што пішуць у інтэрнэце, мы не верым, — кажа намеснік дырэктара ў ідэалагічнай рабоце і сацыяльных пытаннях Яўгеній Шапавалаў. - Мы чыталі, што ў Гарадзеі і Жабінцы размаўлялі з людзьмі [апытвалі работнікаў], але ў нас нічога такога не было. Мне невядома, каб у нас праводзілі ператрусы. Я сёння першы дзень на працы — панядзелак. Што было на выходных, не ведаю. Дырэктар з пятніцы афіцыйна ў адпачынку, планава, усё было ўзгодненае з канцэрнам. Куды дырэктар едзе ў адпачынак, у нас ніхто не ведае, гэта ягоная асабістая справа. З боку праваахоўных органаў ніякая дакументацыя ў нас не запытвалася. Завод працуе, як належыць, у штатным рэжыме. Значных закупаў у нас апошнім часам не было. Мадэрнізацыі ў апошнія гады таксама не адбывалася. У Гарадзею і Жабінку ездзяць нашы спецыялісты, каб падзяліцца досведам. Аб фінансавых узаемастасунках мне нічога не вядома. Наш дырэктар - выключны чалавек, такімі людзьмі нельга раскідвацца. Наш завод найлепшы ў галіны ў Еўропе. Я не ведаю, як яшчэ можна ахарактарызаваць Прудніка. Завод горадаўтваральны, працуе 700 чалавек. Людзі атрымлівалі годны заробак, сацыяльныя выплаты — гэта ўсё пад кіраўніцтвам дырэктара. Без яго швах тут будзе. Такімі людзьмі трэба ганарыцца і берагчы.

Шапавалаву невядома, ці выходзіў на сувязь з падначаленымі дырэктар, які афіцыйна знаходзіцца ў адпачынку.

Дзмітрый Ягораў, Скідзельскі цукровы камбінат

Няма на месцы і дырэктара Скідзельскага цукровага камбіната Дзмітрыя Ягорава. І сакратар прыёмнай, і намеснік кіраўніка Аляксандр Познанскі кажуць, што начальніка выклікалі ў Менск. У пятніцу ж быў звычайны працоўны дзень, і Дзмітрый Ягораў выконваў сваю працу, як і заўсёды — нічога, кажуць, незвычайнага.

Рабочыя завода паціскаюць плячыма: нічога не ведаюць. Кажуць, што «на прадпрыемстве ўсё нармальна, але за навінамі сочаць і ўжо другі дзень абмяркоўваюць чуткі аб затрыманні дырэктара Гарадзейскага цукровага камбіната».

- Мы ў курсе, што нешта адбываецца, але не ведаем, што менавіта. А ў нас пакуль усё ў парадку. Навін няма ніякіх і хай і не будзе, - кажуць рабочыя каля прахадной завода ў Скідзелі.

Дзмітрый Ягораў узначальвае Скідзельскі цукровы завод - найстарэйшае прадпрыемства цукровай прамысловасці краіны з 2006 года.

Што адбылося. Коратка

Нагадаем, 24 студзеня самалёт «Белавія», які ляцеў маршрутам Менск — Мюнхен, развярнулі на падлёце да Вроцлава і пасадзілі ў Гародні.

Як паведамляюць пасажыры гэтага рэйса, з борта знялі ад 6 да 8 чалавек. «Зайшоў мужчына ў форме і сказаў: «Я цяпер назаву некаторыя прозвішчы, вы возьмеце свае рэчы і пройдзеце з намі». Назваў 6 чалавек, але па факце гэта 2 сям'і», - распавёў адзін з пасажыраў. З ягоных слоў, папрасілі выйсці дзве пары, усе яны былі прыкладна аднолькавага ўзросту - блізу 50 гадоў. Пры гэтым адна з пар ляцела разам з дзвюма дзяўчынкамі якім на выгляд ад 12 да 16 гадоў.

З ягоных слоў, праз некаторы час назвалі яшчэ два прозвішчы, гэтых пасажыраў таксама папрасілі пакінуць борт. «Прайшло яшчэ хвілін 20, як прыйшоў чалавек з закрытым тварам (адзін з іх прыкрываў твар шалікам. — Заўвага.). Сказалі ўсім са сваімі рэчамі выйсці, нічога не пакідаць. Мы выйшлі ў аўтобус, але ён нікуды не паехаў, проста зачынілі дзверы, мы стаялі. У гэты час было відаць, як у летаку хадзіў той самы чалавек у масцы і абшукваў яго.

Пры гэтым адзін з пасажыраў заўважыў, што знятыя з рэйса да вылету знаходзіліся разам, размаўлялі. «Яны культурна адпачывалі. Ім было весела, трохі шумна, але ўсё ў рамках прыстойнасці», - распавёў пасажыр.

Пасля рэйс прадоўжыў рух без іх. «Пілот абвясціў, што «непаладкі» выпраўленыя, мы паляцім у Мюнхен, але ўжо без знятых людзей».