Траім асуджаным топ-мэнэджарам «Нафтана» хочуць яшчэ накінуць тэрмін

У снежні 2016 года яны ўжо атрымалі ад 7 да 12 гадоў.

У Віцебску судзяць траіх экс-топ-мэнэджараў «Нафтана» - тых самых, якія ў снежні 2016 года ўжо атрымалі ад 7 да 12 гадоў за злоўжыванне службовымі паўнамоцтвамі і атрыманне хабару. У новай справе, якую пачалі расследаваць у 2019 годзе, - тыя ж злачынствы. 27 студзеня прайшлі спрэчкі на другім працэсе ў дачыненні да былога намесніка гендырэктара ў матэрыяльна-тэхнічным забеспячэнні, начальніка ўпраўлення вытворча-тэхнічнай камплектацыі і начальніка аддзела камплектацыі. З моманту арышту ў ліпені 2014 года мужчыны ўжо правялі ў следчых ізалятарах і калоніях 5,5 года, піша tut.by.

Што адбылося. Коратка

29 ліпеня 2014 года праз падазрэнне ў карупцыі затрымалі 6 чалавек: трох супрацоўнікаў наваполацкага нафтаперапрацоўчага завода «Нафтан», уключаючы намесніка гендырэктара, і трох прадстаўнікоў прыватных кампаній. Гэта было звязана з закупкамі і кантрактамі прадпрыемства, паведамляў СК. Пры ператрусах у затрыманых канфіскавалі больш за паўмільёна даляраў, арыштавалі сем дарагіх аўто бізнэс-класа і ювелірныя вырабы.

Следства паводле справы ішло амаль 2 гады - да сакавіка 2016-га. У тым жа годзе, 1 снежня, суд вынес прысуд.

Было ўстаноўлена, што з чэрвеня 2011-га да ліпеня 2014 года абвінавачваныя атрымлівалі пры закупках узнагароджанне за ўкладанне ўгоды з «Нафтанам». Паводле матэрыялаў справы, яны нанеслі шкоду заводу на 3,4 млн еўраў. Пры гэтым больш за 2,3 млн еўраў абвінавачаныя выплацілі яшчэ да суда.

Экс-намеснік дырэктара ў матэрыяльна-тэхнічным забеспячэнні Сяргей Карась атрымаў 12 гадоў калоніі ўзмоцненага рэжыму з канфіскацыяй маёмасці і з пазбаўленнем права займаць пэўныя пасады на 5 гадоў.

Былога начальніка ўпраўлення вытворча-тэхнічнай камплектацыі Сяргея Гваздзеўскага суд прысудзіў да 9 гадоў з канфіскацыяй і з пазбаўленнем права займаць пэўныя пасады.

Былы начальнік аддзела камплектацыі Максім Пярлоў асуджаны да 7 гадоў узмоцненага рэжыму з канфіскацыяй і таксама з пазбаўленнем права займаць пэўныя пасады.

На карысць «Нафтана» з абвінавачаных спагналі шкоду сумаю 2,182 млн дэнамінаваных рублёў. На карысць дзяржавы спагналі даход, атрыманы злачынным шляхам: 208,2 тысячы рублёў, 168,3 тысячы і 42,1 тысячы рублёў адпаведна з кожнага з абвінавачаных. У даход дзяржавы таксама канфіскаваная маёмасць, набытая злачынным шляхам, - між іншым, Mercedes-Benz ML Е350 2012 года выпуску.

Новую справу пачалі расследаваць у 2019 годзе

Тады абвінавачаныя падалі апеляцыю ў Вярхоўны суд. 26 траўня 2017 г. ён пакінуў прысуд Віцебскага абласнога суда ў дзеянні.

У чэрвені 2017 года мужчыны былі ў калоніях: былы намеснік гендырэктара «Нафтана» Сяргей Карась у Шклове, адзін ягоны падначалены, Сяргей Гваздзеўскі - у Магілёве, другі, Максім Пярлоў - у Бабруйску.

У траўні 2019 года ўсіх траіх этапавалі ў менскі СІЗА на вуліцы Валадарскага: некалькі эпізодаў з першапачатковага абвінавачвання 2014 года выдзелілі ў асобную вытворчасць і пачалі расследаваць новую справу.

Праз пару месяцаў абвінавачаных перавялі ў СІЗА-2 Віцебска. Там яны знаходзяцца дагэтуль, пакуль ідзе другі працэс. Пра гэта паведамілі сваякі абвінавачаных.

57-гадовага Сяргея Карася, 55-гадовага Сяргея Гваздзеўскага і 42-гадовага Максіма Пярлова зноў абвінавачваюць у злоўжыванні службовымі паўнамоцтвамі, што пацягнула прычыненне шкоды ў асабліва буйнай суме, і атрыманні хабару ў асабліва буйнай суме пры заключэнні закупак і кантрактаў з «Нафтанам». Карася і Пярлова таксама абвінавачваюць у замаху на злоўжыванне службовымі паўнамоцтвамі.

Незаконныя ўгоды, у якіх абвінавачваюць былых топ-мэнэджараў, паводле матэрыялаў справы, адбываліся ў 2010-2011 і 2013 гадах.

Пракурор просіць суд дадаць кожнаму з абвінавачаных па году пазбаўлення волі да тых тэрмінаў, якія яны атрымалі ў 2016 годзе. Гэта значыць, на думку дзяржабароны, Карась павінен правесці ў зняволенні 13 гадоў, Гваздзеўскі - 10, а Пярлоў - 8 гадоў.

«Нафтан» выставіў да абвінавачаных пазоў на дадатковае спагнанне шкоды на суму блізу 270 тысяч еўраў.

У судзе 27 студзеня выступіла Таццяна Сычова - адвакатка Сяргея Гваздзеўскага.

- Сёння на ўзроўні кіраўніка дзяржавы ставіцца пытанне аб тым, што людзі неабгрунтавана прыцягваюцца да крымінальнай адказнасці, без канкрэтных довадаў атрымання імі незаконнага грашовага ўзнагароджання. Кіраўнік дзяржавы паказваў на тое, што неабвержнымі довадамі віны з'яўляюцца фота-, відэафіксацыя, а не супярэчлівыя паказанні зацікаўленых у зыходзе справы асоб. Альбо асоба павінна быць затрыманая з довадамі злачынства ў момант атрымання грошай. То бок, калі няма довадаў, няма прадмета хабару, няма фактаў узяцця са здабыткам - няма і прыцягнення да крымінальнай адказнасці. Але, на жаль, наша судовая сістэма ўзяла кірунак, калі агавораў, паказанняў дастаткова, каб прызнаць чалавека вінаватым. Нават нягледзячы на тое, што абгавор супярэчыць фактычным абставінам справы. І гэтая крымінальная спраў - заганны прадукт такога напрамку ў нашай судовай сістэме.

Адвакатка просіць суд апраўдаць Сяргея Гваздзеўскага:

- Спадзяюся, што, заслухаўшы гэту доўгую справу, суд прыйдзе да правільнай высновы аб тым, што ў гэтай сітуацыі магчымы толькі адзіна правільны прысуд - апраўдальны. Трэба спыняць гэтую заганную практыку - выносіць прысуды, якія падрываюць аўтарытэт судовай сістэмы.

Адвакаты Карася і Пярлова выступілі ў спрэчках раней. Яны таксама прасілі суд апраўдаць іх падабаронных.

- Атрымліваецца, што частка тэрміну па прыгаворы суда ўсе трое правялі не ў калоніі, а ў СІЗА. Прычым у СІЗА Віцебска. А гэта ж не Менск. Гэта ўсё вельмі цяжка. Людзі ўжо не маладыя: хваробы і стрэс даюць пра сябе ведаць, - распавялі родныя абвінавачаных.

17 лютага ў судзе заслухаюць апошняе слова былых топ-мэнэджараў «Нафтана».