Пракуратура накіравала ў суд «справу Уцюрына»

Намеснік дзяржсакратара Савета бяспекі, са звестак СМІ, мог рыхтаваць замах на Лукашэнку.

Генеральная пракуратура вывучыла і накіравала ў Вярхоўны суд крымінальную справу паводле абвінавачвання васьмі службовых асоб дзяржаўных органаў і банкаўскіх устаноў і васьмі прадстаўнікоў камерцыйных структур праз учыненне злачынстваў супраць інтарэсаў службы, паведамляе прэс-служба ўстановы.

Абвінавачаным ставяцца ў віну шматлікія факты атрымання і дачы хабараў падчас паставак у Беларусь тэлекамунікацыйнага абсталявання, кампутарнай тэхнікі і праграмнага забеспячэння.

«Пасля праверкі матэрыялаў крымінальнай справы ў Генеральнай пракуратуры прыйшлі да высновы аб поўным, аб'ектыўным і ўсебаковым даследаванні абставін злачынстваў. Пагадзіліся з прававой кваліфікацыяй дзеянняў абвінавачаных», - адзначылі ў ведамстве.

Падчас следства да дванаццаці абвінавачаных выкарыстаная мера стрымання ў выглядзе ўзяцця пад варту, у дачыненнi да iншых абраны хатні арышт, залог, падпіска аб нявыездзе і належных паводзінах.

З пяццю абвінавачанымі ўкладзеныя дасудовыя пагадненні аб супрацоўніцтве. Яны спрыялі папярэдняму следству, выкрыўшы іншых суўдзельнікаў, выдаўшы маёмасць і выплаціўшы даход, атрыманы злачынным шляхам, у поўным аб'ёме выканалі іншыя ўмовы дасудовага пагаднення.

У красавіку 2019 года супрацоўнікі КДБ Беларусі затрымалі намесніка дзяржсакратара Савета бяспекі Андрэя Уцюрына. Гэта не проста высокапастаўлены чыноўнік, а чалавек з найбліжэйшага кола Лукашэнкі, шмат гадоў які ўзначальваў Службу бяспекі прэзідэнта.

У снежні следства паведаміла пра завяршэнне расследавання. Выяўленыя шматлікія факты атрымання і дачы хабараў пры пастаўках тэлекамунікацыйнага абсталявання, кампутарнай тэхнікі і праграмнага забеспячэння. Сярод высокапастаўленых фігурантаў справы - гендырэктар «Белтэлекама» Сяргей Сівадзедаў, старшыня ўправы Беларускага міжбанкаўскага разліковага цэнтра Фелікс Каспяровіч. Усяго паводле справы толькі ў хабарнікаў канфіскавана больш 1,65 млн даляраў, 62 тысячы еўраў, больш за 1 кг золата. У абвінавачванні Уцюрына фігуруе сума хабараў 190 тысяч даляраў.

Нагадаем, у сувязі з затрыманнем Уцюрына шэраг Telegram-каналаў і СМІ заявілі, што намеснік дзяржаўнага сакратара Савета Бяспекі быў затрыманы паводле падазрэння ў падрыхтоўцы замаху на Лукашэнку.