Чаму барацьба з лiшкам рублёў у Беларусі не дапамагае?

Курс даляра то імкліва падае, то расце скачкападобна.

Хоць, здавалася б, і рублёў «свабодных» у Беларусі амаль не засталося, піша infobank.by.

На гэтым тыдні мы назіралі як зніжэнне курсу амерыканскай валюты, так і яе скачок. З чым гэта звязана, калі дзяржава прымае такія тытанічныя намаганні для стрымлівання кошту валют?

Уся справа ў роднаснай сувязі беларускага і расейскага рубля ў адным асобна ўзятым валютным кошыку. Нацыянальны банк Беларусі можа калі заўгодна доўга стрымліваць рост ліквіднасці ў нашай краіне. Але калі Банк Расеі будзе са свайго боку напампоўваць ліквіднасць у РФ, гэта адаб'ецца на курсе расейскага рубля, а ў выніку - на курсе беларускага.

Што і адбылося на гэтым тыдні. Праз аўкцыён РЭПА ў РФ на рынак ўлілі 600 млрд рублёў, частку з якіх банкі тут жа пусцілі на куплю валюты. У выніку, у сераду ўвечары - у чацвер раніцай, даляр і еўра ў Расеі дадалі амаль па рублю. У пятніцу, 16 кастрычніка, «бура» крыху заціхла, але даляр у РФ таннець не спяшаецца.

16 кастрычніка на Маскоўскай біржы курс даляра вырас на 1,83 капейкі, да 77,9644 расейскага рубля. Быццам бы і няшмат, але, калі ўлічыць узлёт напярэдадні, становіцца трохі не па сабе.

Дарэчы, аўкцыёны РЭПА ў Расеі праходзяць рэгулярна, так што такія скокі курсаў валют у найбліжэйшай будучыні цалкам магчымыя.

Вынікі таргоў на Беларускай валютна-фондавай біржы 16 кастрычніка выглядаюць наступным чынам:

курс даляра панізіўся на 0,0031 (-0,12%), да 2,5729 беларускага рубля

курс еўра зменшыўся на 0,0057 (-0,19%), да 3,0118 беларускага рубля

расейскі рубель патаннеў на 0,0074 (-0,22%). У выніку за расейскую валюту даюць 3,2977 беларускага рубля за сотню.