«Клапотная справа»: як беларус стаў знакамітым пасля акцыі ў падтрымку страйкоўцаў

Незвычайная гісторыя жыхара менскай Малінаўкі.

Знаёмыя распавядаюць, што Сяргей ніколі не марыў быць знакамітым. Нават жартуюць, што калі ён прыходзіў на дваровыя сустрэчы, казаў, «Хацеў бы заставацца непазнавальным». Слава прыйшла да яго нечакана: пасля таго, як ён - наўрад ці са сваёй волі, вядома, - зняўся ў роліку міліцыі. Тое, як Сяргей адказваў на пытанні, настолькі «зачапіла» многіх людзей, што запіс разляцеўся па сацсетках і тэлеграм-каналах. У відэа з ім - тысячы праглядаў і сотні каментароў, фразы Сяргея разляцеліся на цытаты, а ў тэлеграме ўжо нават з'явіўся адпаведны стыкерпак, піша tut.by.

Відэа з затрыманымі, якія на камеру распавядаюць, што зрабілі, і раскайваюцца ў тым, што здарылася, міліцыя публікавала не раз. Але, здаецца, міні-інтэрв'ю маладзёна ў кепцы стала самым папулярным.

У роліку хлопец распавядае, як у адзін з дзён пасля 18.00 паехаў на плошчу Незалежнасці, каб паўдзельнічаць у акцыі салідарнасці.

- Акцыя, у якой я хацеў узяць удзел, называецца акцыя салідарнасці са страйкоўцамі, на заводах. Усё такое, - кажа маладзён.

- А вы на «Інтэграле» працуеце - вы бастуете? Канкрэтна вы, - цікавіцца жаночы голас за кадрам.

- Я б з задавальненнем, - адказвае хлопец, - але ў нас асабліва пакуль нічога такога не было.

- І вы хацелі страйкаваць, але наважылі не страйкаваць, бо вы...

- Я наогул не хацеў страйкаваць - гэта клапотная справа, - кажа затрыманы. - Але трэба падтрымаць сваіх, таму я б стаў страйкаваць, калі б яны таксама страйкавалі.

- Што хочаце сказаць іншым грамадзянам? Нейкія, можа, рэкамендацыі даць. Ці варта выходзіць, каб быць затрыманым?

- Я мяркую, што трэба кідаць паліць, чым я і збіраюся заняцца ў найбліжэйшыя 15 дзён, - адказвае хлопец. - І бегаць па раніцах па паўгадзіны. Прычым не так, трушком, а сур'ёзна ганяць ва ўсю моц.

Маладзёна завуць Сяргей. Яму 24 гады. Ён жыве ў менскай Малінаўцы. Са слоў суседзяў, хлопца затрымалі ў панядзелак, 26 кастрычніка. Сёння, 28 кастрычніка, суд Цэнтральнага раёну Менску даў яму 15 дзён паводле 23.34 КоАП.

- Наша класная будзе задаволеная: хоць хтосьці з нас стаў знакамітым, - жартуе аднакласніца хлопца. - Вучыўся Сяргей сярэдне. У яго, дарэчы, і ў жыцці незвычайная манера гаварыць: незразумела - гэта ён сур'ёзна ці смяецца.

- З Сяргеем мы пазнаёміліся ў жніўні, калі ўтварылася наша дваровая «кам'юніці», - распавядае знаёмая і суседка хлопца. - Ён таксама прыходзіў на сустрэчы. Казаў, хоча заставацца незаўважаным. Вельмі ціхі і сціплы хлопец.

Паводле яе слоў, Сяргей цяпер у ІЧУ на Акрэсціна. Суседзі наважылі падтрымаць ягоную маму і дапамагчы ёй сабраць сыну перадачу. На думку знаёмай, адказы на пытанні, якія дае на відэа Сяргей, - гэта іронія. Ролік, вядома, на яе думку, «падымае настрой».

- Вакол шмат сумных навінаў, а такія рэчы дапамагаюць верыць, што ўсё будзе добра. Так нестандартна ён адказвае не ад глупства: чалавек гаворыць абсалютна свядома і разумеючы, што кажа. У той жа час варта разумець, што ў кожным жарце - толькі доля жарту. Ён, дарэчы, сапраўды мяркуе, што трэба бегаць, і ў жыцці гэта яму ўжо некалькі разоў дапамагала.

- Як суседзі даведаліся пра гэта відэа?

- Учора ўвечары яно з'явілася ў нашым дваровым чаце. І ў нас адразу ўзнікла ідэя: сабраць грошы, каб набыць Сяргею добрыя бегавыя красоўкі. Падорым іх, калі ён вернецца дадому. Думаю, яму будзе прыемна. Тым больш, што толькі са спісаў затрыманых мы даведаліся, што 8 кастрычніка ў яго быў дзень нараджэння.