Авіякампаніі плануюць не пускаць на рэйсы пасажыраў без вакцынацыі ад COVID-19

Запуск «пашпарту вакцынацыі» намечаны на першы квартал 2021 года.

Нацыянальны авіяперавозчык Аўстраліі Qantas плануе патрабаваць ад падарожнікаў доказу, што яны былі вакцынаваныя супраць COVID-19, перш чым пусціць іх на борт. Гендырэктар авіякампаніі Алан Джойс у інтэрв'ю cnn.com (пераклад - gordonua.com) паведаміў, што, на яго думку, падобным чынам паступяць і іншыя авіяперавозчыкі.

Пры гэтым Джойс не ўпэўнены, што вакцынацыя будзе абавязковая для падарожжаў унутры краіны, аднак запэўніў, што для пералётаў паміж краінамі такія абмежаванні сапраўды будуць уведзеныя.

Джойс таксама падкрэсліў, што Qantas разглядае магчымасць атрымання пасажырамі «пашпарту вакцынацыі», у якім пазначана, якой менавіта вакцынай вакцынаваўся пасажыр і ці прымальная яна для краіны, у якую чалавек падарожнічае. Такі пашпарт цяпер знаходзіцца ў распрацоўцы Міжнароднай асацыяцыі паветранага транспарту (IATA). Запуск такога пашпарту ў тэставым рэжыме намечаны на першы квартал 2021 года.

Нацыянальны авіяперавозчык Новай Зеландыі Air New Zealand заявіў, што «вельмі натхнёны навінамі пра вакцыны», і дадаў, што «ў канчатковым выніку ўрады павінны вызначаць, калі і як бяспечна зноў адкрываць межы, і мы працягваем цесна супрацоўнічаць з уладамі ў гэтым пытанні».

Успышка каранавіруснай інфекцыі пачалася ў канцы 2019 года ў Кітаі. 11 сакавіка 2020 года Сусветная арганізацыя аховы здароўя абвясціла распаўсюджванне каранавіруса пандэміяй.

Паводле звестак амерыканскага Універсітэта Джонса Хопкінса на 24 лістапада, каранавірусам у свеце заразілася больш за 59 млн чалавек. Памерла ад COVID-19 амаль за 1,4 млн, а паправіліся 37,9 млн пацыентаў.