FT: Вакцыны ад COVID-19 даюць надзею на аднаўленне сусветнай эканомікі

Аднак гэты працэс будзе нераўнамерным.

Навіны пра высокую эфектыўнасць вакцынаў супраць COVID-19 даюць пробліскі надзеі на аднаўленне сусветнай эканомікі, мяркуюць у Арганізацыі эканамічнага супрацоўніцтва і развіцця (АЭСР). Аднак эканамічнае аднаўленне пасля пандэміі мае шмат патэнцыйных падводных камянёў, піша Financial Times (пераклад – zn.ua).

Апублікаваўшы свае апошнія прагнозы датычна сусветнай эканомікі, Арганізацыя эканамічнага супрацоўніцтва і развіцця, якая базуецца ў Парыжы, прагназуе паляпшэнне стану глабальнай эканомікі ў 2021 годзе, аднак сусветная эканоміка можа не аднавіцца цалкам нават да канца наступнага года.

«Мы ўсё яшчэ знаходзімся ў сярэдзіне найгоршага крызісу, але цяпер ёсць надзея. Праблема заключаецца ў тым, як хутка і з як мага меншай шкодай выйсці з крызіснай сітуацыі», – сказала галоўная эканамістка АЭСР Лоўрэнс Бун.

У найбліжэйшыя месяцы для краінаў будзе найважнейшай задачай паскорыць дастаўку вакцынаў і наладзіць эфектыўныя сістэмы тэставання і адсочвання кантактаў, каб як мага хутчэй зняць карантын, з мэтай наладжвання працы эканамічнай сферы. Краіны, якія выканаюць гэтую задачу хутка і паспяхова, верагодна, атрымаюць лепшыя эканамічныя паказнікі.

Прагнозы паказваюць, што эканоміка Кітая да канца наступнага года, як чакаецца, вырасце амаль на дзесяць адсоткаў у параўнанні з канцом 2019 года, дзякуючы паспяховай медыка-эканамічнай рэакцыі на пандэмію, прычым Паўднёвая Карэя і Інданэзія таксама маюць высокія шанцы на паспяховае эканамічнае аднаўленне.

Эканамічныя паказнікі з абодвух бакоў Атлантыкі значна адстаюць ад гэтых азіяцкіх краінаў, але, як чакаецца, ЗША адновяць страчаны аб'ём вытворчасці да канца наступнага года, нягледзячы на вялікую колькасць выпадкаў каранавірусу ў краіне.

Паводле прагнозаў АЭСР, Еўропа будзе «працаваць горш»: з буйных эканомік кантынента толькі Нямеччына наблізіцца да аднаўлення свайго «дапандэмічнага эканамічнага маштабу» – чакаецца, што эканоміка краіны будзе на 1,7 адсотка меншая ў апошнім квартале 2021, чым падчас эквівалентнага перыяду 2019 года.

Краіны, якія ўводзілі найбольш доўгачасовыя локдаўны, атрымаюць найгоршыя вынікі, уключаючы Вялікую Брытанію, дзе, паводле прагнозаў АЭСР чакаецца, што ў канцы наступнага года аб'ёмы вытворчасці будуць на шэсць адсоткаў ніжэйшыя, чым было да пачатку пандэміі, і Аргенціна, якая страціць амаль восем адсоткаў агульнага аб'ёму вытворчасці.

Нават калі глабальнае аднаўленне пачне дзейнічаць, сусветная эканоміка ўсё роўна будзе на пяць адсоткаў меншая на канец 2021, чым прагназавала АЭСР год таму – выразны паказнік росту, страчаны ў выніку пандэміі. Таксама прагназуецца і больш нізкі ўзровень жыцця, высокі ўзровень беспрацоўя і няроўнасці, з прычыны таго, што больш за ўсё пацярпелі эканамічныя перспектывы бедных і моладзі.

АЭСР заявіла, што ўрады павінны прадаўжаць падтрымліваць сваё насельніцтва, дзе гэта магчыма, свабоднай фіскальнай палітыкай і не надта актыўна звяртацца да памяншэння бюджэтнага дэфіцыту, пакуль выдаткі не будуць «эканамічна выгаднымі».

Там, дзе дзяржаўныя выдаткі выкарыстоўваюцца эфектыўна, высокі ўзровень дзяржаўнай пазыкі не павінен выклікаць непакой, паколькі выдаткі на абслугоўванне пазыкі з'яўляюцца нізкімі, адзначае АЭСР.

Арганізацыя таксама мяркуе, што адной з важных сфераў, дзе варта засяроджваць выдаткі, з'яўляецца пераадоленне «лічбавых рознагалоссяў» унутры і паміж краінамі. Пандэмія паказала няздольнасць адукацыйных сістэмаў у многіх краінах працаваць дыстанцыйна з дапамогай відэасувязі.

Іншым прыярытэтам павінна стаць дапамога тым, хто страціў працу. Нідэрланды і скандынаўскія краіны з'яўляюцца прыкладамі поспеху ў гэтых сферах.

АЭСР таксама паказала на адсутнасць глабальнага эканамічнага супрацоўніцтва. Неабходна арганізаваць шырокую і хуткую вытворчасць і распаўсюджванне эфектыўных вакцынаў для ўсіх краінаў, каб дапамагчы сусветнай эканоміцы выйсці з пандэміі, рэзюмуе выданне.