Еўракамісія ўхваліла вакцыну BioNTech і Pfizer

Усе краіны ЕЗ атрымаюць прэпарат BioNTech/Pfizer у адзін час і на роўных умовах.

Праз некалькі гадзін пасля сертыфікацыі вакцыны ад каранавіруса BNT162b2, распрацаванай нямецкай кампаніяй BioNTech і амерыканскай Pfizer, Еўракамісія канчаткова ўхваліла прэпарат. У хуткім часе краіны ЕЗ змогуць прыступіць да вакцынацыі, заявіла ведамства ўвечары ў панядзелак, 21 снежня.

У сваю чаргу кіраўнік Еўракамісіі Урсула фон дэр Ляен паведаміла, што вакцына будзе даступная адначасова ўсім краінам ЕЗ і ўсе яны атрымаюць прэпарат на аднолькавых умовах.

Раней у той жа дзень Еўрапейскае агенцтва лекавых сродкаў (EMA) дапусціла да выкарыстання ў ЕЗ вакцыну BioNTech і Pfizer. Кіраўніца EMA Эмер Кук заявіла, што гэты прэпарат, як мяркуецца, эфектыўны і супраць новага штаму каранавіруса, які пачаў імкліва распаўсюджвацца ў Англіі ў апошні тыдзень.

Вакцына BNT162b2 ужо выкарыстоўваецца ў цэлым шэрагу краін, у тым ліку ў Вялікабрытаніі, ЗША, Канадзе, Бахрэйне, Савудаўскай Арабіі і Мексіцы. У Нямеччыне і многіх іншых краінах ЕЗ да вакцынацыі плануецца прыступіць яшчэ да канца снежня.

Паводле вынікаў даследаванняў, эфектыўнасць прэпарата дасягае 95%, у выпадку з людзьмі старэйшымі за 65 гадоў - больш за 94%. Сур'ёзных пабочных дзеянняў ва ўдзельнікаў выпрабаванняў, больш за 40% якіх - людзі ва ўзросце ад 56 да 85 гадоў, дагэтуль не выяўлена. У выпрабаваннях вакцыны, якая зніжае да мінімуму рызыку цяжкай плыні віруснай пнеўманіі COVID-19, удзельнічалі 43,5 тысячы чалавек, амаль палова з іх атрымала плацэба.