Камбоджа пагадзілася прыняць круізны лайнер, які не ўпускалі ў іншыя краіны

Лайнер Westerdam больш за тыдзень не можа прычаліць ля азіяцкіх партоў праз боязь каронавіруса.

Камбоджа прыме круізны Лайнер Westerdam, нягледзячы на магчымую наяўнасць на борце заражаных каронавірусам пасажыраў. Судна прыбудзе ў камбоджыйскі порт Сіануквіль у чацвер раніцай, паведамляе zn.ua са спасылкай на японскае агенцтва Kyodo News.

Westerdam пакінуў Ганконг 1 лютага, і з таго часу яго адмовіліся прыняць пяць партоў праз асцярогі, што некаторыя пасажыры могуць быць хворыя на каронавірус. Лайнер не прынялі ўлады Японіі, Філіпін, Гуама, Тайланда і Тайваня.

На борце круізнага лайнера знаходзяцца 1 455 пасажыраў і 802 сябры экіпажа. Усе яны здаровыя, паведамляе аператар лайнера Holland America Line. Планавалася, што пасажыры высадзяцца з карабля ў японскай Ёкагаме 15 лютага.

Дзяржсакратар міністэрства аховы здароўя Камбоджы Вандзін заявіла, што, «калі пасажыры сапраўды здаровыя, то, вядома, ім павінны дазволіць правесці канікулы ў Камбоджы».