ЗША ўвялі санкцыі супраць расейскага распрацоўніка гіпергукавых ракет

Санкцыі ўведзеныя за парушэнне рэжыму нераспаўсюджвання зброі масавага знішчэння.

ЗША ўвялі санкцый супраць трох расейскіх абаронных прадпрыемстваў за парушэнне рэжыму нераспаўсюджвання зброі масавага знішчэння.

Пад абмежавальнымі захадамі з 3 лютага знаходзіцца ВПК «НВА машынабудавання» - найбуйнейшы ў Расеі распрацоўнік баявых ракетных комплексаў, вынікае з паведамлення ў рэестры нарматыўных актаў Federal Register, піша finanz.ru.

З гэтага часу прадпрыемству, якое распрацоўвае поўны спектр ракетнай і касмічнай тэхнікі - ад ракет-носьбітаў і спадарожнікаў да крылатых і балістычных ракет, - забароненыя кантакты з амерыканскімі дзяржструктурамі і закупы амерыканскага абсталявання.

Пад аналагічныя санкцыі патрапілі Кумертаўскае авіяцыйнае вытворчае прадпрыемства - размешчаны ў Башкірыі завод, дзе вырабляюцца і рамантуюцца верталёты Ка-266, а таксама тульскае «Канструктарскае бюро прыборабудавання», у лінейцы якога высокадакладная зброя, сістэмы СПА, у тым ліку комплексы «Панцыр-С1».

«НВА машынабудавання» з'яўляецца распрацоўнікам гіпергукавых ракет «Цыркон» - аднаго з шасці тыпаў найноўшай зброі, якую прэзідэнт РФ Уладзімір Пуцін прадставіў публіцы ў 2018 годзе.

Паводле звестак амерыканскага Nuclear Threat Intiative (NTI), з анансаваных Расеяй распрацовак пакуль толькі комплексы «Кінжал», створаныя для мадэрнізаваных далёкіх перахопнікаў МіГ-31, у рэчаіснасці існуюць у войсках.

У агляднай перспектыве (да 2022 года) магчымае таксама стварэнне міжкантынентальных ракет «Сармат», якія заменяць ракеты «Ваявода» з боегалоўкамі, што падзяляюцца, але страчваюць баяздольнасць праз драхласць.

Што да іншых распрацовак, то яны альбо з'яўляюцца аддаленай перспектывай, альбо немагчымыя ў прынцыпе.

Напрыклад, ракета «Цыркон», якая паводле расейскіх звестак, праходзіць выпрабаванні, можа з'явіцца толькі ў «2025-30 гадах альбо пазней», беспілотная субмарына «Пасейдон» - пасля 2027 года, а ракета з ядзерным рухавіком «Буравеснік» - «пасля 2030, калі наогул будзе пабудаваная», адзначае NTI.