Замежнікі не могуць патрапіць у Беларусь праз «лісты шчасця»

Часам людзі не могуць уехаць праз нявыплачаныя $ 6.

«Замежнікаў усё часцей не пускаюць у Беларусь праз нявыплачаныя штрафы за перавышэнне хуткасці. Часам людзі не могуць уехаць праз нявыплачаныя 12 рублёў», – апавядаюць tut.by уладальнікі фірмаў арэнды аўтамабіляў. Праблема гэта не новая, аднак з часам яна не развязалася, а наадварот – пагоршылася.

– Так, бывае, што нашы кліенты перавышаюць вызначаную хуткасць і трапляюць на камеры. Даведацца пра гэта аператыўна, напрыклад, пры вяртанні машыны, мы часцей за ўсё не можам: інфармацыя пра парушэнне яшчэ не трапіла ў базу. Праз некаторы час «лісты шчасця» прыходзяць на фірмы арэнды аўто, але кіроўца, які парушыў, ужо з'ехаў з краіны, – апавёў Дзяніс, кіраўнік кампаніі арэнды машынаў «Пчолка Мая». – Пастановы мы перадаем у ДАІ разам з дамовай арэнды аўто – даказваем, што за рулём быў наш кліент, ён парушыў ПДР і штраф павінен заплаціць ён.

Такім чынам штрафы «пераходзяць» з фірмаў на канкрэтных людзей, але яны пра гэта не ведаюць: пастановы за перавышэнне хуткасці замежнікам ДАІ не рассылае. У выніку многія штрафы застаюцца нявыплачанымі, а госці трапляюць у спіс асобаў, уезд якім у Беларусь забаронены. Напрыклад, так летась адбылося з Крыстаферам Райхам з Нямеччыны: мужчына ехаў на ўласнае вяселле, але яго развярнулі на мяжы праз нявыплачаны штраф за 2017 год.

– Масава праз штрафы за хуткасць людзей перасталі пускаць у краіну летась. І хоць у нашы абавязкі гэта не ўваходзіць, мы пачалі апавяшчаць сваіх кліентаў пра «лісты шчасця» на іх імя. Нам нават ДАІ рэкамендавала: пытайцеся ў арандатараў тэлефоны, на якіх ёсць мэсэнджары, адрасы электроннай пошты.

Але пракатчыкі інфармуюць кліентаў пра парушэнні толькі за 2019 год, праз гэта часам узнікаюць вялікія праблемы.

– Неяк да нас ехаў чалавек, у якога былі штрафы за мінулы год, мы яму паведамілі пра гэта, і ён іх аплаціў. А калі прыляцеў у наш аэрапорт, то яго не пусцілі: высвятляецца, на ім вісяць штрафы за 2018 год!

Паводле словаў Дзяніса, фірмаў арэнды аўто ў Беларусі 50–70, блізу 20 з іх – буйныя. І ўсе яны заваленыя пастановамі пра перавышэнне хуткасці, якое дапусцілі іх кліенты. Напрыклад, у «Пчолку Маю» ўлетку прыходзіць блізу 100 «лістоў шчасця» за месяц, зімой – 15–20.

Як паведамлялі ў МУС Беларусі, прычыны, з якіх замежніку могуць адмовіць ва ўездзе ў нашу краіну, прыводзяцца ў артыкуле 30 Закона «Аб прававым становішчы замежных грамадзянаў і асобаў без грамадзянства ў Рэспубліцы Беларусь». У спіс асобаў, уезд якіх у Беларусь забаронены або непажаданы, даволі часта трапляюць замежнікі, якія падчас папярэдняга знаходжання ў нашай краіне зазналі адміністрацыйныя спагнанні ў выглядзе штрафу і своечасова не заплацілі яго.

Каб не было праблемаў на мяжы, трэба яшчэ да паездкі звярнуцца ў Дэпартамент грамадзянства і міграцыі МУС ці ў тэрытарыяльныя падраздзяленні грамадзянства і міграцыі ГУУС, УУС. Зрабіць гэта можа сам замежнік праз электронную пошту ці яго законны прадстаўнік, праз даверанасць у любым падраздзяленні ДГіМ. Адрасы і e-mail размешчаныя на сайце МУС.

Датэрмінова зняць абмежаванне на ўезд можна: напрыклад, заплаціць штраф і копію квітанцыі разам з заявай накіраваць праз электронную пошту або паказаць праз законнага прадстаўніка ў падраздзяленні Дэпартамента грамадзянстве і міграцыі.

Прадпрымальнік апавёў, што толькі на гэтым тыдні трох ягоных кліентаў, якія забраніравалі аўто, не пусцілі праз мяжу. А за апошнія паўгода набярэцца не менш за 10 выпадкаў.

– Нават праз штраф 12 з капейкамі рублёў не пускаюць. Пару дзён таму да нас прыляцеў з Лондана расейскамоўны мужчына, у Беларусі яго сустракала жонка. А яго не пусцілі! Ноч ён правёў у аэрапорце. Ягоная жонка выплаціла штраф і дамаўлялася з кімсьці, каб яе мужа не развярнулі назад.

Дарэчы, нават калі іншаземец даведаецца пра нявыплачаны штраф, то з ягонай выплатай з-за мяжы таксама ёсць праблемы. Праз АРІП гэта зрабіць нельга. Некаторыя просяць дапамагчы знаёмых ці сваякоў у Беларусі.

– Гэтае пытанне можна было б развязаць, усталяваўшы на мяжы і ў аэрапорце тэрмінал. Прыехаў вінаваты, заплаціў штраф на месцы – і паехаў далей, – прапануюць свой варыянт пракатчыкі аўто.