Што здарылася з зімой у Беларусі?

Кліматычная зіма ў нашай краіне так і не наступіла.

Кліматычная зіма ў Беларусі ў гэтым сезоне дагэтуль не надышла і, калі наступныя два тыдні будзе ўстойлівая плюсавая тэмпература, то і не наступіць зусім. Тады гэтая зіма ўвойдзе ў гісторыю краіны як адзіная зіма, якой не было, піша tut.by.

Кліматычная зіма - гэта перыяд з сярэднядзённай тэмпературай паветра 0 градусаў і ніжэй. Пачаткам кліматычнай зімы лічыцца ўстойлівы пераход сярэднядзённай тэмпературы праз 0 градусаў у бок паніжэння, канцом - устойлівы пераход праз 0 градусаў у бок падвышэння. Наша разуменне кліматычнай зімы падобна з паняццямі кліматычнай зімы ў іншых постсавецкіх краінах.

- Гэтай зімой у нас ўстойлівага пераходу сярэднядзённай тэмпературы праз 0 градусаў у бок паніжэння пакуль не было, - кажа Наталля Клявец, начальніца аддзела вывучэння змен клімату Белгідрамета. - Ці будзе ў гэтым сезоне кліматычная зіма, сказаць складана, гэта паняцце прывязанае да прагнозу надвор'я, але пакуль мы яе не чакаем.

Звычайна кліматычная зіма ў Беларусі пачынаецца ў канцы лістапада - пачатку снежня. У мінулым сезоне яна пачалася 8 студзеня. Як правіла, заканчваецца кліматычная зіма ў першай-другой дэкадзе сакавіка, а на поўдні, паўднёвым захадзе краіны - у канцы лютага.

- Сезону без кліматычнай зімы ў нас яшчэ не было. Калі два наступныя тыдні будуць цёплыя, то гэтая зіма будзе самай цёплай за ўсю гісторыю метэаназіранняў і, магчыма, стане адзінай, калі кліматычная зіма не надышла. Самая цёплая зіма ў нас раней была ў 1989-1990 гадах, там сярэдняя мінусавая тэмпература апынулася мінус 0,1 градуса.

У сярэднім кліматычная зіма ў Беларусі на поўдні краіны магла быць 60 дзён, а на поўначы і паўночным усходзе - 90-100 дзён. З часам працягласць кліматычнай зімы памяншаецца.

- У сярэднім з 1989 да 2019 год кліматычная зіма скарацілася дзесьці на пяць-сем дзён у параўнанні з нормай. Чакаецца, што ў будучыні зімовыя тэмпературы будуць расці, адпаведна, кліматычная зіма будзе скарачацца.

Наталля Клявец адзначае: тое, што ў гэтым годзе кліматычная зіма не надышла, - анамалія.

- Гэта нетыповыя ўмовы для тэрыторыі нашай краіны. Мы бачым пераважна сярэднядзённыя станоўчыя тэмпературы, і гэта не нармальна. І, хутчэй за ўсё, ад гэтага будзе больш адмоўных наступстваў, чым станоўчых. У гэтым годзе ў нас былі частыя пераходы са станоўчых тэмператур да адмоўных, і гэта негатыўна адбіваецца на даўгавечнасці будынкаў і збудаванняў.