Колькі каштавацьме аўто старэйшае за пяць гадоў з ільготнай размытнёўкай з Еўропы

Ці ёсць сэнс беларусам займацца гэтым?

140-ы ўказ адкрыў шырокія магчымасці для прыгону аўтамабіляў з Еўропы і ЗША. Пачалі больш актыўна прыганяць аўто з рухавікамі вялікіх аб'ёмаў і малодшыя за 3-ы гады. А што калі паспрабаваць з ільготай прыгнаць "старэчу"?

Разглядаць будзем зусім розныя варыянты з Еўропы, піша выданне abw.by. Але відавочна адно: у кожным выпадку мерапрыемства не самае выгаднае. Прыганяць мае сэнс ці нешта вельмі рэдкае, або малааб'ёмнае. Нам вядома, што як мінімум Mazda RX8 і Сadillac ELR старэйшыя за 5 гадоў ужо прыганяюць паводле льготнай размытнёўкі. Таму сядаем лічыць, наколькі гэта мае сэнс.

Пачнем з чаго-небудзь рэдкага. У Беларусі няма ніводнага Porsche 914, але тым, хто вырас на Need For Speed 5, запомнілася гэтая незвычайная мадэль нямецкага вытворцы з "адкрыванымі" фарамі і двума багажнікамі. У Нямеччыне мы знайшлі аўтамабіль 1973 года выпуску з прабегам 77.000 км.

Каштуе аўто нятанна – 21 000 еўраў, прычым гэта яшчэ невысокі кошт на гэтую мадэль. Размытнёўка рухавіка аб'ёмам 1668 "кубікаў" складзе 5838 еўраў, але калі падзяліць на 2, то атрымліваецца 2919 еўраў. Утыльзбор будзе каштаваць 816 рублёў, або 347 еўраў. Закладваем 500 еўраў на дарогу - атрымліваецца, што такі аўтамабіль паводле 140-га ўказа каштавацьме ў Беларусі 24.766 еўраў, або 27.242 даляраў.

Калі ўжо зусім размроіцца, палічым прыгон Porsche 356B за 79.950 еўраў. Размытнёўка рухавіка аб'ёмам 1582 куб.см каштавацьме 5537 еўраў без ільгот або 2768 еўраў з ільготамі.

Дадаём прыгон і утыльзбор - атрымліваецца 83.565 еўраў або 91.921 даляр. Паводле факту растаможка льготных аўто з малааб'ёмным рухавіком і старэйшыя за 5 гадоў не асабліва моцна павялічвае кошт. Аднак трэба ўлічваць, што олдтаймеры і янгтаймеры ў Еўропе каштуюць зусім не танна.

А як справы з янгтаймерамі? Палічым прыгон легендарнага BMW E30 ў кузаве купэ. За 5 900 еўраў ў Нямеччыне прадаецца аўто 1990 г.в. з прабегам 190.000 км.

Аб'ём рухавіка - 1591 куб.см, таму размытнёўка каштавацьме 5569 еўраў без ільгот або 2784 еўраў з ільготамі. Дадаем усе выдаткі - атрымліваем BMW E30 з Нямеччыны за 9531 еўраў, ці 10.484 даляра. Скажам так, нятанна. У Беларусі такіх коштаў на гэтыя аўто няма і блізка. Самы дарагі аўтамабіль у аб'явах - дрыфт-праект на базе Е30 за 7000 даляраў.

І ўсё ж прыганяць больш мае сэнс які-небудзь эксклюзіў. За 6 600 еўра ў Нямеччыне прадаецца Fiat 500 1971 года. У нас і сучасных рэінкарнацый гэтай мадэлі мала, не кажучы ўжо пра класічны "пяцісоты".

Размытнёўка рухавіка аб'ёмам 499 "кубікаў" каштавацьме ўсяго 1497 еўраў, а з ільготнай размытнёўкай і зусім 748 еўраў. Дадамо ўсе астатнія выдаткі - льготніку такі аўтамабіль каштавацьме ў Менску 8195 еўраў ці 9000 даляраў.

Smart Roadster у нас у продажы няма наогул. А аўто цікавае: родстэр з двума дзвярыма, задні прывад, малааб'ёмны эканамічны рухавік. Надзейнасць рухавіка і "робата" з адным счапленнем невысокая, але аўто ў кожным выпадку цікавае. Асабліва калі знайсці ў Еўропе добра захаваны асобнік.

Так, у Нямеччыне за 2990 еўраў прадаецца аўто 2004 года. Размытнёўка 698-кубоў рухавіка будзе каштаваць 2094 еўраў, а паводле 140-га ўказа - 1047 еўраў. Усяго прыгон такога аўто льготніку каштавацьме 4884 еўраў ці 5327 далараў. Гэта нават танней, чым прыганяць такі варыянт з Расеі. У Беларусі аб'яў аб продажы няма.

Mazda RX-8 таксама варыянт. Нам вядома, што ў Беларусь такое аўто прыганяюць. У Нямеччыне за 4 999 еўра прадаецца асобнік 2004 года. Рухавік малааб'ёмны ротарны - 1308 куб.см, але магутнасці аж 192 л.с. Аўто важыць мала, рухавік высокабаротны, таму разгон вельмі хуткі.

На мытні без ільгот мы пакідаем 4186 еўраў, з ільготамі - 2093 еўры. З усімі выдаткамі такі самаход атрымліваецца ў Менску з ільготнай размытнёўкай за 7939 еўраў, ці 8732 даляры. У аб'явах такія аўто прапануюцца коштам ад 6000 да 10.000 даляраў, прычым усяго ў продажы 4 асобнікі.

У гэтага аўтамабіля прабег 124.000 км, у якім стане рухавік - невядома.

Alfa Romeo Spider 1988 г.в. прадаецца за 13.999 еўраў. Рэдкі асобнік, на нашых дарогах такога заўважана не было.

Рухавік не малалітражны - 1948 куб.см, яго размытнёўка каштавацьме 9448 еўраў без ільгот і 4724 еўры з ільготамі. Усяго на аўто двядзецца выдаткаваць 19.570 еўраў або 21.527 даляраў.

А калі спусціцца з нябёсаў на зямлю і паглядзець што-небудзь для шматдзетных? У Літве мы знайшлі Renault Grand Scenic 2011 года з 1,4-літровым бензінавым рухавіком.

Каштуе аўто 3950 еўраў. Размытнёўка з ільготамі будзе 2240 еўраў. Утыльзбор складзе 347 еўраў, а прыгон, дапусцім, 100 еўраў. Разам атрымліваецца 6637 еўраў ці 7300 даляраў. Што цікава, у Беларусі такія аўто каштуюць блізу 8000 даляраў, пры гэтым бензінавых мадыфікацый практычна няма.

Паглядзім, ці варта прыганяць малалітражкі. Nissan Micra 2003 г.в. прадаецца ў Літве за 1100 еўраў. Льготная размытнёўка складзе 1984 еўраў. У выніку, у Менску такое аўто будзе за 3500 еўраў, ці 3850 даляраў. У прынцыпе гэта супастаўна з коштамі на беларускім рынку. Сэнс ёсць, толькі калі ехаць па аўто ў лепшым стане ці браць у сваяка/знаёмага аўто, гісторыя абслугоўвання якога вядомая.

Яшчэ адзін цікавы варыянт - Subaru Libero, пра самаробную электрычную версіі якога мы нядаўна пісалі. Аўто 1994 года з прабегам 168.000 км прадаецца за 1900 еўраў. Дадамо сюды ільготную растаможку 1190-кубоў рухавіка (1904 еўраў) і ўсе астатнія выдаткі - атрымліваецца 4647 еўраў, ці 5111 даляраў.

І напрыканцы - эксклюзіўны Ford Taunus 1964 г.в. за 7 990 еўраў. Размытнёўка рухавіка аб'ёмам 1758 куб.см. з ільготамі каштавацьме 3076 еўраў. Усяго з усімі выдаткамі такое аўто будзе каштаваць 11.919 еўраў або 13.110 даляраў. Дарагавата, але нічога такоўскага ў Беларусі і блізка няма. Увагу на дарогах забяспечана!

Наш вердыкт

Такім чынам, 140-ы ўказ дазваляе прыганяць аўто не толькі да 5 гадоў. Вядома, старыя аўто нават з ільготамі ўвозіць у краіну не асабліва выгадна, але калі гаворка ідзе пра якія-небудзь эксклюзіўныя экзэмпляры, асабліва з малааб'ёмнымі рухавікамі, то сэнс у гэтым мерапрыемстве з'яўляецца. Калі ёсць, зразумела, льготы. Таму мара пра які-небудзь эксклюзіў цалкам здзяйсняльная.