Савудаўская Арабія і саюзнікі разрываюць дамоўленасці з Расеяй

Канец угоды АПЕК+.

Ідылія ў адносінах найбуйнейшых нафтаздабыўных краін свету, уключаючы Расею і Савудаўскую Арабію, якія з 2016 года ўзгоднена кантралююць здабычу, не дапускаючы лішку на рынку і новага абвальвання коштаў, падобна, падыходзіць да канца. Праз рознагалоссі з Масквой з нагоды рэакцыі на эпідэмію каронавіруса ў Кітаі, блізкаўсходнія члены АПЕК разглядаюць магчымасць адмовіцца ад нафтавага альянсу з РФ, паведамляе The Wall Street Journal са спасылкай на крыніцы ў картэлі (пераклад - sprotyv.info).

Савудаўская Арабія і яе партнёры ў асобе ААЭ, Кувейта і Амана прапаноўвалі скараціць здабычу нафты яшчэ на 0,5-1 млн барэляў у дзень, каб згладзіць правал кітайскага попыту, праз якога кошт Brent абрынуўся на 18% у лютым.

Экстраннае пасяджэнне ў Вене 6-9 лютага, якое працягвалася тры дні замест запланаваных двух, было безвыніковым. Угаварыць Расею далучыцца да новых квотаў не ўдалося. Кіраўнік Мінэнерга РФ Аляксандр Новак патлумачыў расейскую пазіцыю тым, што эфект ад эпідэміі яшчэ не ясны, і для яго ацэнкі патрабуецца больш часу.

З тых часоў мінула два тыдні, і пэўнага адказу ад Масквы не было. У гэтыя дні Савудаўская Арабія, ААЭ і Кувейт пачалі закрытыя перамовы аб дзеяннях без каардынацыі з РФ. Саўдзіты і іх саюзнікі абмяркоўваюць магчымасць скараціць здабычу на 300 тысяч барэляў у дзень, кажуць крыніцы WSJ. Са слоў аднаго з іх, Расея па-ранейшаму адмаўляецца ісці на дадатковыя меры.

Хоць АПЕК абмяркоўвае скарачэнне здабычы, якое ў тэорыі павінна падтрымаць цэны, рынак нярвуецца: угода АПЕК+ была ключавым падмуркам пад стабільнасцю барэля, а яе развал можа «абярнуцца хаосам», папярэджвае сыравінны стратэг ING Уорэн Патэрсан.

На навінах пра гатоўнасць саўдзітаў пакончыць з нафтавым альянсам, кошт Brent падае на 2%, да 58,14 даляра за барэль, WTI таннее на 1,3%, да 53,2 даляра за бочку.

Міністр энэргетыкі Савудаўскай Арабіі прынц Абдулазіз бін Сальман уважае сітуацыю на нафтавым рынку тлеючым пажарам, які неабходна патушыць, пакуль не позна, кажа крыніца WSJ. Апошнюю спробу дамовіцца, відавочна, ён распачаў 18 лютага, калі правёў тэлефонную размову з Новакам.

Але адказ яго наўрад ці задаволіў. «Сітуацыя вельмі хутка змяняецца. Вось цяпер якія ў нас цэны? Усё прагназавалі, што ўсё будзе падаць, а кошты вунь, бачыце, - ужо 59. Яны выраслі амаль на 10% ад ніжняга», - радаваўся расейскі міністр 20 лютага. На здабывальную прамысловасць прыпадае 38% вытворчасці ў Расеі, нагадвае дырэктар аналітычнага дэпартамента «Лока-Інвест» Кірыл Трэмасаў: любое скарачэнне ў сектары ўдарыць па макрапаказчыкам, што наўрад ці прымальна для чыноўнікаў, якім ужо ў наступным годзе трэба даць справаздачу аб росце ВУП на 3% і вышэй.