У Беларусі каранавірус выяўлены ўжо ў 27 чалавек
62- 13.03.2020, 14:13
- 67,078
Міністэрства аховы здароўя абнавіла звесткі пра эпідэмію.
РНК каранавіруса ў Беларусі выяўлена ў 27 чалавек, першыя трое выпісаныя, паведамляе прэс-служба Міністэрства аховы здароўя.
Ва ўстановах аховы здароўя 24 чалавекі і таксама застаюцца ва ўстановах аховы здароўя «кантакты першага ўзроўню».
Учора колькасць заражаных каранавірусам Міністэрства аховы здароўя ацэньвала як 22 чалавекі.
«7 хворых далі па 2-3 кантакты заражаных. З тых, хто захварэў адзін, на жаль, схаваў інфармацыю пра наведванне Паўночнай Італіі, своечасова не выклікаў хуткую дапамогу. У выніку ён даў больш за 90 чалавек «першага кантакту», - гаворыцца ў паведамленні Міністэрства аховы здароўя.
Нагадаем, што беларускія ўлады папярэдзілі кіраўнікоў медыцынскіх устаноў аб крымінальнай адказнасці за распаўсюд інфармацыі аб захворвання каранавірусам, «каб не сеяць паніку і не дэстабілізаваць сітуацыю ў краіне".
Раней, беларускія ўлады датэрмінова спынілі карантын у БНТУ, дзе былі выяўленыя выпадкі захворвання каранавірусам, а міністр аховы здароўя Беларусі Уладзімір Каранік заявіў, што ягонае міністэрства «ацэньвае рызыку развіцця цяжкіх формаў хваробы як не вельмі высокую». Таксама кіраўнік Міністэрства аховы здароўя заявіў аб «асаблівых перавагах Беларусі ў барацьбе з каранавірусам».
Міністэрства аховы здароўя Беларусі адмовілася ўводзіць карантын у дзіцячых садках і ўстановах адукацыі, нягледзячы на тое, што тысячы беларусаў патрабуюць ад уладаў гэта зрабіць. Адзін з лідараў беларускай апазіцыі Мікалай Статкевіч таксама запатрабаваў ад уладаў неадкладна ўвесці карантын у сувязі з эпідэміяй каранавіруса.
Тым часам суседзі Беларусі - Польшча, Літва, Латвія - прымаюць эфектыўныя захады для барацьбы з каранавірусам.