8 красавiка 2020, Серада, 21:48
Заставайся дома!
Рубрыкі

Новыя звесткі: Каранавірус не шкадуе і міленіялаў

9
Новыя звесткі: Каранавірус не шкадуе і міленіялаў
Фота: Getty Images

Маладыя людзі часта думаюць, што яны недасягальныя, але гэта не так.

У той час як людзі па ўсім свеце ізалююць сябе ў карантыне, п'яныя студэнты ладзяць вечарынкі на пляжах Маямі ў Флорыдзе, паведамляе ВВС.

Маладыя людзі часта думаюць, што яны недасягальныя, але гэта не так.

"Калі я падчаплю каранавірус, значыць так таму і быць. І я не дазволю гэтаму перашкодзіць мне радавацца жыццю", – сказаў на камеру адзін вельмі чырванатвары малады чалавек.

Відэа разышлося ў інтэрнэце і абурыла карыстальнікаў.

Шмат хто ў ЗША задае пытанне, ці дастаткова даходліва медыкі тлумачаць маладым людзям сітуацыю з вірусам.

Звесткі пра раннія выпадкі, зарэгістраваныя ў краіне, кажуць пра тое, што ён не менш небяспечны для маладых, чым для ўсіх астатніх.

Новыя звесткі

На гэты момант праводзіцца недастаткова тэставання, каб дакладна сказаць, хто больш схільны да заражэння і якія механізмы перадачы вірусу.

Да гэтага часу медыкі рабілі прыблізныя прагнозы ва ўзроставых групах, і меркавалася, што маладых пацыентаў будзе нязначная колькасць.

Аднак апошні даклад Цэнтра кантролю і прафілактыкі захворванняў ЗША (CDC) паказвае, што суадносіны могуць быць зусім іншыя.

ПАЛІЦЫЯ ВЫПРАВАДЖВАЕ АДПАЧЫВАЛЬНІКАЎ З САУТ-БІЧ У ФЛОРЫДЗЕ. ПАЗНЕЙ ПЛЯЖ БЫЎ ЦАЛКАМ ЗАЧЫНЕНЫ
ФОТА: AFP

Аўтары даклада прааналізавалі 2500 пацверджаных выпадкаў каранавірусу і адзначылі, што 20% хворых – людзі ва ўзросце 20–44 гадоў і 38% – ад 20 да 54 гадоў.

Паводле іх звестак, 20–30-гадовыя не нашмат радзей трапляюць у лякарні, чым 50–60-гадовыя.

Пры гэтым, сапраўды, большасць тых, хто памёр ад Covid-19 – пажылыя людзі. 14,8% усіх смяротных выпадкаў у свеце прыпадаюць на пацыентаў, старэйшыя за 85 гадоў і толькі 0,2% на тых, каму няма 40.

Але гэта не азначае, што малады арганізм не можа падчапіць вірус або пераносіць захворванне ў больш лёгкай форме.

Аўтары даклада CDC таксама адзначаюць, што толькі нешматлікія маладыя пацыенты з дыягназам Covid-19 апынуліся ў інтэнсіўнай тэрапіі, звычайна ў іх захворванне працякае ў менш цяжкай форме. Але і яны ўсё роўна ствараюць нагрузку на сістэму аховы здароўя.

Паводле афіцыйных звестак, апублікаваных на мінулым тыдні ў Італіі, 12% захварэлых, дастаўленых у рэанімацыі, адносяцца да ўзроставай групы 19–50 гадоў. Інфармацыя, якая паступае з Францыі, таксама кажа пра тое, што колькасць заражаных сярод моладзі расце.

Некаторыя эксперты пры гэтым заклікаюць стрымана ставіцца да новых звестак.

Фота: Getty Images

Марк Ліпсіц, прафесар эпідэміялогіі з Гарвардскай школы аховы здароўя, у каментары Бі-бі-сі сказаў, што здзіўлены пастановай CDC выпусціць такі даклад.

Тэставанне ў ЗША і ў многіх іншых краінах свету праводзілася толькі ў трох вызначаных групах: сярод людзей, якія вярнуліся з зоны эпідэміі; сярод тых, хто кантактаваў з людзьмі з пацверджаным дыягназам, і ў выпадку з'яўлення ярка выражаных сімптомаў.

Звесткі ва ўсіх трох катэгорыях збіраліся рознымі метадамі, і рабіць высновы на іх аснове няправільна, бо няма цэласнай карціны, мяркуе эксперт.

"Думаю, дакладна можна сказаць, што ў цэлым у маладых людзей хвароба працякае ў больш лёгкай форме, але і сярод іх могуць быць вельмі цяжкія выпадкі", – кажа прафесар Ліпсіц.

Таму, мяркуе эксперт, у гэтым выпадку не ўжываецца стратэгія выпрацоўкі "групавога імунітэту". Моладзь – вельмі шматлікая група, нават невялікі адсотак цяжкіх хворых сярод іх – гэта шмат у абсалютных ліках.

Дае надзею той факт, што дзеці і падлеткі амаль не трапляюць у шпіталь з каранавірусам. Статыстыка ўсіх без выключэння краінаў паказвае, што насельніцтва, маладзейшае за 19 гадоў, у значна меншай ступені адчувае Covid-19. Навукоўцы пакуль не разумеюць, чаму так адбываецца.

Апошнія звесткі таксама паказваюць, што маладыя і здаровыя, нават самі не хварэючы, могуць быць носьбітамі вірусу і перадаваць яго людзям з групаў рызыкі – пажылым і з хранічнымі захворваннямі.

САЗ і ўлады ЗША прадаўжаюць заклікаць: мыйце рукі, дыстанцуйцеся адно ад аднаго і ўнікайце вечарынак на Маямі-Біч.