Хворая на каранавірус спартоўка: Лекары ўцякалі ад мяне, як ад чумы

Гісторыя расейскай біятланісткі.

Расейская біятланістка Настасся Халівуліна мяркуе, што заразілася каранавірусам у маскоўскім аэрапорце. Пра гэта спартоўка распавяла на сваёй старонцы ў сацсетцы «Інстаграм», паведамляе выданне 4vsar.ru.

Спартоўка прыбыла з Масквы ў аэрапорт Гагарын рэйсам SU 1356 к 7.25 раніцы. Яна пайшла на самаізаляцыю і праінфармавала аб сваім стане лекараў

Настасся распавяла, што спачатку знаходзілася на спаборніцтвах у Аўстрыі, а потым вярталася дадому праз Маскву.

«Я ляцела дадому праз Маскву, і мне давялося доўгі час знаходзіцца ў аэрапорце. Як мне здаецца, там я і падхапіла вірус. Дома, праз некалькі дзён, у мяне вечарамі пачала падымацца тэмпература да 37-37.1 градусаў, была слабасць і галаўны боль, пазней з'явіліся смаркачы. Агулам амаль нічым не адрознівалася ад звычайнай прастуды. У маім выпадку была толькі адна недарэчнасць, на пару дзён у мяне амаль цалкам зніклі нюх і адчуванне смаку», - успамінае Халівуліна.

Спартоўкка піша, што паведамляла пра сваё самаадчуванне ў паліклініку, але «лекары прыходзілі на хвіліну і ўцякалі, як ад чумы».

«Тым часам загадчыца спрабавала ўсімі сіламі адправіць мяне ў шпіталь, каб адказнасць была ўжо не на іх, як бачыце, у яе атрымалася», - дадала дзяўчына.

Пакуль яна чакала вынікі, самаадчуванне палепшылася, тэмпература спала, але яе ўсё адно адправілі ў медычную ўстанову, не чакаючы вынікаў.

«Больш за тое, у лекара, які за мной назірае, таксама іх не было (аналізаў - рэд). На мае званкі мне хамавата адказвалі, на мае пытанні пра вынікі, можна сказаць, пасылалі, на пытанні, на якой падставе мяне сюды паклалі, атрымлівала невыразныя адказы. Першы аналіз апынуўся «сумнеўным», больш ніякіх тлумачэнняў», - паведаміла Наста.

Станоўчым быў вынік другога аналізу, які ў яе ўзялі ўжо ў лякарні.

«І так без сімптомаў мяне ізалявалі на 2 тыдні, хоць многіх пакідаюць дома, хто хварэе ў лёгкай форме. Лячэнне даўно спынілі, пакінулі супрацьвіруснае і хлоргексідын. Але проста так ужо адсюль не адпускаюць, вось узялі два аналізы, і, як будзе вядома, што яны адмоўныя, мяне адпусцяць», - сказала на заканчэнне біятланістка.

Варта адзначыць, што ў Беларусі дагэтуль не ўведзены меры карантыннага характару. Праходзяць рэпетыцыі парада з удзелам вялікай колькасці вайскоўцаў, масавыя спартыўныя і культурныя мерапрыемствы.