Лядзенскі манастыр, у які на Вялікдзень ездзіў Лукашэнка, закрыты для наведванняў
26- 27.04.2020, 19:03
- 48,167
Два чалавекі ў манастыры заразіліся каранавірусам.
Мужчынскі манастыр у вёсцы Малыя Ляды Смалявіцкага раёна, на тэрыторыі якога знаходзіцца Свята-Благавешчанскі Лядзенскі храм, куды на Вялікдзень прыязджаў Аляксандр Лукашэнка з сынам Мікалаем, зачынены для наведвання. Медыкі з Смалявіцкай цэнтральнай раённай бальніцы кажуць, што там ёсць выпадкі заражэння каранавірусам.
Пра тое, што два чалавекі ў Лядзенскім манастыры заразіліся каранавірусам, а іх кантакты першага ўзроўню - 55 чалавек - знаходзяцца на ізаляцыі, tut.by паведаміў чытач, які працуе ў сістэме аховы здароўя Смалявіцкага раёна.
- Хворых адправілі ў мясцовую амбулаторыю, а кантакты ў манастыры, - распавёў суразмоўца.
У Драчкоўскай амбулаторыі каментаваць інфармацыю аб тых, хто заразіўся адмовіліся і папрасілі больш ім не тэлефанаваць, а звяртацца ў Цэнтральную раённую бальніцу.
Адзін з медыкаў Смалявіцкай цэнтральнай раённай бальніцы, які пажадаў застацца ананімным, пацвердзіў, што ў манастыры ёсць афіцыйна зарэгістраваныя выпадкі каранавіруса. З яго слоў, 54 жыхары Лядзенскага манастыра - манахі, паслушнікі і іншыя - з'яўляюцца кантактамі першага ўзроўню і знаходзяцца на самаізаляцыі.
- Дакладней, павінны былі б знаходзіцца. Яны абсалютна не выконваюць правілы самаізаляцыі, сілкуюцца ў агульных сталовых, кантактуюць адзін з адным. Паводле маіх звестак, сярод жыхароў гэтага манастыра шмат хто захварэў, - 16 чалавек на гэты момант, - распавядае медык. - Некаторыя шпіталізаваны ў нас, некаторыя ў Менску, некаторыя ў манастыры засталіся.
Як кажа медработнік, першы станоўчы тэст на каранавірус, узяты ў жыхароў манастыра, у бальніцу прыйшоў 22 красавіка.
У самым манастыры расказаць, што ж там адбываецца і якая эпідэмічная сітуацыя, адмовіліся. Таксама там адзначылі, што ў іх няма такой колькасці насельнікаў (гэта паслушнік або манах, які пастаянна пражывае ў манастыры, чалец манастырскай браціі. - Заўвага.), як кажуць медыкі. Паводле інфармацыі на сайце Барысаўскай епархіі, там пастаянна жывуць блізу 20 чалавек.
- Інфармацыі мы ніякай не даем, - сказалі ў манастыры.
Там таксама дадалі, што «ў царкве ніхто не заражаецца».
У Барысаўскай епархіі не пацвердзілі, што ў манастыры ёсць хворыя.
- Па каранавірусу пацверджанняў няма. Але кляштар зачынены для наведванняў у сувязі са складаным эпідэмічным становішчам. Унутраны распарадак у манастыры застаўся ранейшым, але для наведвальнікаў кляштар зачынены, - распавёў прэс-сакратар Барысаўскай епархіі іерэй Ігар Васько.
Нагадаем, Лукашэнка на Вялікдзень запаліў свечку ў Свята-Благавешчанскім Лядзенскім храме, які знаходзіцца на тэрыторыі манастыра.