Беларуска ў Італіі: Час, калі маска - добры падарунак

Берасцейка распавяла, як амаль месяц жыве ў карантыне ў Італіі.

У рэгіёне Ламбардыя, дзе цяпер жыве берасцейка Ірына, карантын быў абвешчаны 8 сакавіка, піша «Брестская газета». За амаль месяц жанчына выходзіла з хаты толькі ў краму. Даслоўна за 200 метраў ад яе дома вялікі супермаркет, які на час карантыну не зачынялі.

Першапачаткова па пакупкі Ірына адпраўлялася адзін раз у два дні, цяпер імкнецца рабіць гэта радзей - раз у чатыры-пяць дзён.

У крамы ў горадзе абсалютна ўсе ходзяць у масках. На ўваходзе ўсім мераюць тэмпературу. Тых, у каго яна падвышаная, не прапускаюць. Акрамя таго, перад уваходам у краму ўсім пакупнікам выдаюць пальчаткі. У супермаркетах працуюць усе касы, каб максімальна размеркаваць паміж імі пакупнікоў.

«Прадуктаў на гэты момант стае. Ёсць і мяса, і рыба. Проста няма ўжо такой разнастайнасці, як было раней», - дадала берасцейка.

Двойчы за гэты месяц Ірына хадзіла ў аптэку па антысептыкі і пальчаткі. Дзверы там зачыненыя, унутр не пускаюць. Лекі і іншыя медпрэпараты прадаюць праз акенца. З маскамі ў італьянскіх аптэках праблема, як і ў беларускіх, - іх хутка разбіраюць.

«Мне маску падаравалі. Мы зараз дайшлі да таго часу, калі маска - добры падарунак», - падзялілася жанчына.

У астатні час усе яе выхады за межы дома абмяжоўваюцца выкідам смецця ў кантэйнеры ў двары.

«Калі выходжу выносіць смецце, гуляю па двары. Дыхаю паветрам. Тут нікога няма. Або сяджу на балконе», - распавяла Ірына.

З яе знаёмых у Італіі ніхто каранавірус не падхапіў. Прынамсі, жанчына пра гэта не чула. Праўда, у пад'ездзе 7-павярховага шматкватэрнага дома, дзе жыве Ірына, захварэў мужчына, яго шпіталізавалі. Цяпер яго шматдзетная сям'я - жонка і дзеці - знаходзіцца ў поўнай ізаляцыі, ім забаронена выходзіць з кватэры, а прадукты харчавання ім прыносяць валанцёры.

Адразу па ўсім доме з'явілася напамінанне аб дадатковых мерах засцярогі, накшталт выкарыстання антысептычных сурвэтак пры націску кнопак ліфта і іншыя. Жыхары дома пачалі самі кожны дзень мыць дэзінфікуючымі сродкамі пад'езд.

«Усе дапамагаюць адзін аднаму і разумеюць, наколькі ўсё сур'ёзна», - дадала Ірына.

У горадзе Галараце, дзе яна жыве, каранавірус выяўлены на сённяшні дзень у 102 чалавек пры 55 тысячах насельніцтва.

«Пакуль у нас, на жаль, не гавораць пра тое, што мы дасягнулі піка захворвання», - дадала яна.

«Калі шчыра, я стараюся не глядзець тэлевізар. Толькі ў інтэрнэце чытаю навіны. Тут ужо даўным-даўно скончыліся ўсе гэтыя флэшмобы на балконах, калі людзі сядзелі ў карантыне і думалі, чым заняцца. Сітуацыя вельмі сур'ёзная. Калі ўсё гэта скончыцца, ніхто не ведае і не прагназуе», - з сумам у голасе працягнула свой аповед пра сітуацыю ў Італіі Ірына.

Карантын у Італіі падоўжаны пакуль да 13 красавіка.

«Не магу сказаць, што я без працы праводжу час. Увесь свой вольны час я прысвячаю вучобе і зносінам са сваімі сябрамі і блізкімі праз тэлефон, інтэрнэт і відэасувязь», - дадала Ірына.