Скончылася рэзанансная справа аб забойстве журналіста ў Славаччыне
3- 6.04.2020, 17:18
- 11,604
Злачынца, які прызнаў віну, атрымаў 23 гады турмы.
Суд Славаччыны прысудзіў былога вайскоўца Міраслава Марчэка да 23 гадоў турмы за забойства журналіста-даследчыка Яна Куціяка і ягонай нявесты ў лютым 2018 года, паведамляе «Радыё Свабода».
Марчэк не прысутнічаў пры вынясенні прысуду. Раней ён прызнаў сваю віну.
Паводле справы аб забойстве ў канцы снежня мінулага года суд прыгаварыў да 15 гадоў пазбаўлення волі Золтана Андруска. Суд назваў яго пасярэднікам у злачынстве. Падчас працэсу ён прызнаў віну і ўклаў угоду са следствам.
Куціяк і ягоная нявеста былі застрэленыя ва ўласным доме недалёка ад Браціславы. У апошнім матэрыяле, над якім журналіст працаваў перад смерцю, ён расследаваў сувязі набліжаных тагачаснага прэм'ер-міністра Славаччыны Роберта Фіцо з італійскай мафіяй.
Забойства Яна Куціяка і пасмяротная публікацыя ягонага няскончанага артыкула выклікалі масавыя антыўрадавыя дэманстрацыі ў Славаччыне і прывялі да палітычнага крызісу ў краіне. Ён скончыўся адстаўкай урада.
Таксама Куціяк расследаваў дзейнасць кампаній, звязаных са славацкім бізнэсоўцам Марыянам Кочнерам. За год да забойства журналіст паведамляў уладам аб сачэнні і пагрозах ад Кочнера, аднак ніякіх захадаў ужыта не было.