Расею чакае хваля дэфолтаў

Частата дэфолтаў у рэстарацый, рытэйлераў і ўладальнікаў камерцыйнай нерухомасці павялічыцца ў разы.

Расейскую банкаўскую сістэму чакае хваля дэфолтаў у кампаній з пацярпелых ад пандэміі сектараў, папярэджвае ЦБ Расеі ў «Аглядзе фінансавай стабільнасці».

Узровень неплатаздольнасці рытэйлераў, уладальнікаў камерцыйнай нерухомасці, грамадскага харчавання і гатэляў падскочыць у 2-3 разы, піша finanz.ru.

Максімальны ўзровень дэфолтаў - 11-13% - чакае гатэльна-рэстаранны бізнэс. Аб'ём безнадзейных запазычанасцяў у сектары можа ўтроіцца.

Да 9-10% вырасце доля дэфолтаў сярод пазычальнікаў са сферы гандлю і вытворчасці тавараў не першай неабходнасці. Гэта таксама ў 2-3 разы вышэй за ўмоўна «нармальны» ўзровень. У цяжкім становішчы апынуліся кампаніі, якія маюць валютную запазычанасць, але не атрымліваюць ніякага валютнага прыбытку, адзначае ЦБ: акрамя сціску эканомікі па іх ударыць падзенне рубля, якое павялічыць кошт абслугоўвання запазычанасці.

Гаворка ідзе ў першую чаргу пра «кампаніі, якія ажыццяўляюць аперацыі з нерухомай маёмасцю». На 1 красавіка яны былі завінавачаныя банкам 10,9 млрд даляраў.

«Пры гэтым у кампаній практычна адсутнічае валютны прыбытак для абслугоўвання запазычанасці», - канстатуе ЦБ: гэта абяцае «істотнае пагаршэнне фінансавага становішча і рост частоты дэфолтаў як мінімум у 2,5 разы, да 6-7% на год».

Пакуль статыстыка цэнтрабанка не фіксуе праблем у крэдытных партфелях: доля «дрэнных» і безнадзейных пазык (IV і V катэгорый якасці) хоць і расце, але застаецца ніжэйшай, чым у канцы мінулага года - 12,4% па крэдытах у рублях і 9,4 % па крэдытах у валюце (супраць 13% і 9,8% на кастрычнік-2019).

«Аднак у далейшым можна чакаць пагаршэння якасці крэдытнага партфеля», - папярэджвае ЦБ.

У зоне рызыкі практычна кожны пяты рубель, выдадзены банкамі ў выглядзе карпаратыўных крэдытаў: на пацярпелыя галіны прыпадае 17,8% партфеляў.

Калі ж улічыць раздробныя крэдыты, то агульны аб'ём патэнцыйна праблемнай пазыкі дасягае 19 трыльёнаў рублёў, казала ў канцы красавіка старшыня ЦБ Эльвіра Набіуліна. Гэта траціна крэдытнага партфеля банкаў, 17,2% расейскага ВУП і амаль 100% аб'ёму федэральнага бюджэту.

Банкі, паводле слоў Набіулінай, здольныя перанесці страты на 5 трыльёнаў рублёў - такая мяжа трываласці сістэмы за кошт рэзерваў і «буфераў» капіталу.

Што тычыцца магчымага адтоку кліенцкіх грошай, то банкі здольныя кампенсаваць блізу 40% сваіх абавязацельстваў у рублях, або 15 трлн рублёў - на такую суму ў іх маюцца ў наяўнасці ліквідныя актывы, у тым ліку грошы на дэпазітах у ЦБ і не закладзеныя каштоўныя паперы, вынікае з агляду ЦБ.

Валютныя абавязацельствы забяспечаныя горш: 55 млрд даляраў у выглядзе ліквідных актываў кампенсуюць 37,9% дэпазітаў фізічных асоб і карпарацый і 18,6% ад усіх валютных абавязацельстваў.