Пуцін прызначыў галасаванне наконт свайго «абнулення» на 1 ліпеня
16- 1.06.2020, 17:02
- 23,768
Першапачаткова яго планавалі правесці 22 красавіка.
Прэзідэнт Расеі Уладзімір Пуцін падтрымаў прапанову кіраўніцы ЦВК РФ Элы Памфілавай правесці агульнарасейскае галасаванне аб папраўках у Канстытуцыю РФ 1 ліпеня.
«1 ліпеня глядзіцца як дзень, які цалкам пасуе», - сказаў Пуцін падчас рабочай нарады, трансляцыю якога вёў тэлеканал «Расія 24», паведамляе «Медуза».
Выслухаўшы каментары кіраўнікоў ЦВК і Расспажыўнагляду, прэзідэнт прызначыў галасаванне на 1 ліпеня.
Падчас нарады прэзідэнт таксама паведаміў, што на правядзенні галасавання не трэба эканоміць.
Эла Памфілава распавяла, што галасаванне пройдзе як на выбарчых участках, так і на даму з выкананнем захадаў бяспекі праз каранавірус.
Са слоў кіраўніцы Цэнтрвыбаркама, на участках будуць галасаваць не больш за восем чалавек за гадзіну. Падчас надомнага галасавання члены выбаркамаў не будуць уваходзіць у дамы выбаршчыкаў, адзначыла Памфілава.
Газета «Коммерсант» раней паведаміла, што ЦВК дазволіў галасаваць за папраўкі ў Канстытуцыю датэрмінова і на даму без паважных прычын.
Першапачаткова галасаванне аб папраўках у Канстытуцыю планавалася правесці 22 красавіка, але яго адклалі на нявызначаны тэрмін праз пандэмію каранавіруснай інфекцыі.