Бабруйцы на пікеце за Ціханоўскую: Ведаеце, мы за каго заўгодна, толькі не за вядомага таварыша
3- 5.06.2020, 18:35
- 16,015
Жыхары горада выстойваць у чарзе да самага вечара, каб прагаласаваць супраць Лукашэнкі.
4 чэрвеня ў Моладзевым парку бабруйцы сталі ў дзве доўгія чаргі, каб пакінуць подпіс за прэтэндэнта ў кандыдаты ў прэзідэнты Святлану Ціханоўскую. Пікет пачаўся а 14.00, і да вечара людзей становіцца толькі больш, піша babruysk.by.
Подпісы за Ціханоўскую збіраюць у двух намётах. Людзі казалі, што гатовыя падпісвацца за каго заўгодна, абы не за Лукашэнку.
«Ведаеце, дайшло ўжо ў нас да стану - мы за каго заўгодна, толькі не за вядомага таварыша», - адзначае мужчына амаль у хвасце чаргі. Ён гатовы прастаяць і некалькі гадзін, каб паставіць подпіс за Ціханоўскую.
Палац мастацтваў «забяспечыў» пікетам музычнае суправаджэнне. У альтанцы непадалёк паставілі калонкі і запусцілі песні пра Беларусь і Бабруйск. У перапынках паміж кампазіцыямі мастацкі кіраўнік Палаца мастацтваў прэзентуе розныя гурткі і творчыя калектывы горада. Гэта ніяк не звязанае са зборам подпісаў, пераконвае жанчына. Проста трэба набраць дзяцей на новы навучальны год, а іншых магчымасцяў гэта зрабіць, акрамя як вось так публічна прэзентаваць, праз карантын няма. Але да альтанкі ніхто не падыходзіць.
Сёння пікет будзе прадаўжацца з 12.00 да 20.00.