Reuters даведаўся пра планы ЗША ўвесці санкцыі супраць дзясяткаў танкераў

Гаворка ідзе пра танкеры, якія займаліся вывазам нафты з Венесуэлы.

ЗША могуць увесці санкцыі супраць дзясяткаў нафтавых танкераў за перавозку сыравіны з Венесуэлы, паведамляе Reuters са спасылкай на крыніцы, піша РБК.

Некаторыя з абмежаванняў могуць быць апублікаваныя ўжо ў найбліжэйшай будучыні, некаторыя – пазней, калі гандаль з Венесуэлай будзе доўжыцца, паведамляе выданне.

Санкцыі могуць закрануць 25 супертанкераў, якія могуць перавозіць да 2 млн бар. нафты, і 17 больш дробных судоў. «Выніковы эфект можа стаць ясным сігналам для ўсіх суднаўладальнікаў: мяркуйце Венесуэлу забароненай зонай», – сказала адна з крыніцаў.

У пачатку тыдня Вашынгтон наклаў санкцыі на чатыры суднаўладальніцкія кампаніі, у тым ліку на іх караблі, за тое, што яны перавозілі нафту з Венесуэлы. Караблі зарэгiстраваныя на Маршалавых астравах і ў Грэцыі. Мінфін ЗША мяркуе, што яны перавозілі нафту ў лютым – красавіку 2020 года. Пасля накладання санкцый іх амерыканскія актывы будуць заблакаваныя, таксама яны не змогуць заключаць угоды з кампаніямі ЗША і грамадзянамі краіны.

ЗША мяркуюць дыктатара Венесуэлы Нікаласа Мадуру нелегітымным кіраўніком дзяржавы, а ягоны ўрад – карумпаваным. У якасці прэзідэнта ў Вашынгтоне прызнаюць спікера венесуэльскага парламента Хуана Гуайдо, які абвесціў сябе часовым кіраўніком дзяржавы.

У студзені 2019 года ЗША ўвялі санкцыі супраць венесуэльскай дзяржаўнай нафтавай кампаніі PDVSA. Пры гэтым адміністрацыя ЗША пакінула за сабой права выдаваць часовыя ліцэнзіі на транзакцыі з кампаніяй. З дапамогай абмежаванняў Вашынгтон спрабуе перашкодзіць Мадуру адпампаваць сродкі з нафтавай кампаніі, паведамлялі чыноўнікі.

У красавіку 2019 года ЗША ўвялі санкцыі супраць дзвюх кампаній, якія перавозілі нафту на Кубу, і 34 танкераў PDVSA. У траўні пад абмежаванні патрапілі яшчэ дзве кампаніі і два караблі, звязаныя з перавозкай нафты з Венесуэлы на Кубу.

У лютым 2020 года прэзідэнт ЗША Дональд Трамп нагадаў пра ціск, які ЗША робяць на пакупнікоў венесуэльскай нафты, і паведаміў пра гатоўнасць узмацніць яго. Сярод іншага, амерыканскі прэзідэнт згадаў пра магчымасць новых, больш сур'ёзных санкцый.