Прэзідэнт Швайцарыі ўпершыню наведае Украіну і разам з Зяленскім паедзе на Данбас

Прэзідэнт Швайцарыі будзе знаходзіцца ва Украіне з дзяржаўным візітам тры дні.

Прэзідэнт Швайцарыі Сіманета Замаруга наведае Данбас разам з кіраўніком украінскай дзяржавы Уладзімірам Зяленскім.

Пра гэта паведамляе прэс-служба ўкраінскага прэзідэнта.

Яны разам азнаёмяцца з палітычнай і сацыяльна-эканамічнай сітуацыяй у рэгіёне і «станам рэалізацыі праектаў швайцарскай гуманітарнай дапамогі».

Прэзідэнт Швайцарыі будзе знаходзіцца ва Украіне з дзяржаўным візітам 20-23 ліпеня на запрашэнне Зяленскага. Бакі правядуць перамовы тэт-а-тэт і ў складзе дэлегацый. Паведамляецца, што на перамовах «запланаванае абмеркаванне шырокага спектру пытанняў двухбаковых украінска-швайцарскіх стасункаў, а таксама ўзаемадзеянне бакоў на міжнароднай арэне».

Сіманета Замаруга - першы замежны лідар, які наведае Украіну падчас пандэміі каранавіруса. Візіт быў запланаваны яшчэ на сакавік, але праз каранавірус яго перанеслі. Гэта будзе першы ў гісторыі візіт прэзідэнта Швайцарыі ва Украіну.