Расейскія банкі страцілі траціну запасаў валюты

Запасы свабоднай валюты ў банкаў зменшыліся да 6,8 млрд даляраў.

Расейская банкаўская сістэма сутыкнулася з прыкметным скарачэннем запасаў валютнай ліквіднасці, нягледзячы на тое, што і фізічныя асобы і карпаратыўныя кліенты спынілі вывад валюты з рахункаў, паведамляе finanz.ru.

За травень запасы свабоднай валюты ў банкаў зменшыліся амаль на траціну - з 9,6 да 6,8 млрд даляраў, адзначаюць аналітыкі Райффайзенбанка ў аглядзе ў чацвер.

Гаворка ідзе пра свайго кшталту ценявыя валютныя рэзервы краіны - сродкі, якія банкі трымаюць у ліквідных актывах і на карэспандэнцкіх рахунках за мяжой звыш той сумы, якую самі завінаваціліся кліентам у разліковых рахунках.

У траўні банкі адбіралі грошы з замежных карэспандэнцкіх рахункаў - гэта стала галоўным фактарам змяншэння валютнай ліквіднасці.

Месяцам раней крэдытныя арганізацыі, наадварот, стваралі валютную «падушку» праз боязь далейшых уцёкаў укладчыкаў. Але гэтыя страхі не апраўдаліся. У траўні фізасобы прынеслі на валютныя дэпазіты 0,7 млрд даляраў. Яшчэ на 1,1 млрд млрд даляраў папоўніліся карпаратыўныя рахункі.

У суме банкі атрымалі ад кліентаў 1,8 млрд даляраў, што, зрэшты, кампенсавала менш за траціну адтоку красавіка і сакавіка (6,1 млрд даляраў).

З гэтай сумы 0,8 млрд даляраў банкі накіравалі ў валютнае крэдытаванне. Такім чынам, паводле вынікаў крэдытна-дэпазітных аперацый банкаўская сістэма атрымала нэта-прыток на 1 млрд даляраў.

Нягледзячы на гэта, запасы валютнай ліквіднасці скарачаюцца, і гэта «з'яўляецца адным з фактараў, якія выступаюць на карысць паслаблення рубля», кажа аналітык Райффайзенбанка Дзяніс Парывай.

Акрамя гэтага на рубель будуць ціснуць аднаўленне імпарту, па-ранейшаму нізкія даходы ад экспарту нафты (пастаўкі за мяжу ў ліпені ўпадуць на 40%), а таксама дывідэнтны сезон, зазначае ён.

З ліпеня замежныя трымальнікі акцый расейскіх кампаній пачнуць канвертаваць у валюту атрыманыя выплаты. Агулам, на ацэнку «Газпрамбанка», ім давядзецца набыць на рынку блізу 5 млрд даляраў.

«Чорнымі днямі» для рубля можа абярнуцца пачатак жніўня, калі ў дывідэндах адплацяцца Ашчадбанк, «Газпром» і ЛУКОЙЛ. У іх паперах вялікая доля нерэзідэнтаў, якія ў суме набудуць валюты на 3,6 млрд даляраў, вынікае з ацэнкі ГПБ.

Ашчадбанк пералічыць дывідэнды (403,6 рублёў) 30 ліпеня, і да 4 жніўня ў валюту будзе канвертаванае 1,364 млрд даляраў.

«Газпром» расплаціцца 31 ліпеня (359,8 млрд рублёў), і да 5 жніўня ягоныя замежныя акцыянеры набудуць валюту на 1,341 млрд даляраў. Закрые дывідэнтны сезон ЛУКОЙЛ. 1 жніўня ён пералічыць 262,5 млрд рублёў, з якіх у валюту сыдзе 887 млн даляраў да 6 жніўня.