Ва Украіне злодзей аўтамабіля з гранатай узяў у закладнікі паліцэйскага
7- 23.07.2020, 12:56
- 20,562
Паліцэйскі абмяняў сябе на закладніка.
У Палтаве зламыснік з гранатай адпусціў узятага ў закладнікі паліцэйскага ў абмен на начальніка дэпартамента крымінальнага вышуку Галоўнай управы Нацпаліцыі Украіны ў Палтаўскай вобласці Віталя Шыяна, запатрабаваў аўтамабіль і цяпер накіроўваецца на ім у бок выезду з горада, піша "Гордан".
"23 ліпеня а 9.00 на вуліцы Астапа Вішні, ля будынка адміністрацыйнага суда, падчас затрымання работнікамі паліцыі злодзея аўтамабіля апошні дастаў гранату РГД-5, якую пагражаў падарваць. Сітуацыя ўскладнялася тым, што зламыснік захапіў у закладнікі работніка крымінальнага вышуку. Пасля перамоў зламыснік памяняў утрыманага работніка крымінальнага вышуку на начальніка дэпартамента крымінальнага вышуку Галоўнай управы Нацпаліцыі ў Палтаўскай вобласці палкоўніка паліцыі Віталя Шыяна, з якім паехаў на выдадзеным у адпаведнасці з ягонымі патрабаваннямі транспартным сродку ў кірунку выезду з горада", - гаворыцца ў паведамленні.
Цяпер спецаперацыя для затрымання зламысніка трывае.
"Працягваюцца перамовы, мэта якіх прымусіць зламысніка здацца паліцыі, не чынячы шкоды ні сабе, ні навакольным. Уведзена ў дзеянне паліцэйская спецыяльная аперацыя "Гром", - напісаў на сваёй старонцы ў Facebook намеснік міністра ўнутраных спраў Украіны Антон Герашчанка.
Патрульная паліцыя Палтавы паведаміла, што тэрарысту далі службовы аўтамабіль ВАЗ-2111 ("Богдан"), які цяпер рухаецца ў кірунку Кіева, паведамляе мясцовае выданне "Палтаўшчына".