У кватэру беларусаў запаўзла рэдкая для нашага рэгіёну змяя

Звычайна такія водзяцца ў трох штатах Мексікі.

Гэта адбылося ў шматкватэрным доме на вуліцы Жасткова ў Віцебску. Гаспадары заўважылі яркую змяю і звярнуліся ў МНС. Кажуць, не ведалі, ці з'яўляецца яна атрутнай. Ратавальнікі адлавілі рэптылію і часова перадалі ў гарадскі заапарк, паведамляе прэс-служба МНС.

Пасля затрымання было вызначана, што ў госці да беларусаў прыпаўзла сіналойская малочная змяя. Балазе яна не атрутная. Такія водзяцца ў Сярэдняй Амерыцы, у Мексіцы, паўднёва-заходняй Санора, Сіналоа і паўднёва-заходняй Чіуауа. Рэптылія адносіцца да роду каралеўскіх змей сямейства вужападобных.

У падобных выпадках МНС рэкамендуе выяўляць асцярожнасць і публікуе шэраг простых правілаў для людзей, якія трапілі ў такую сітуацыю:

калі вы не прафесійны герпетолаг, не спрабуйце вылавіць змяю самастойна;

пакіньце дом;

папярэдзьце родных, суседзяў пра знаходжанне змяі ў доме;

паведаміце пра здарэнне выратавальнікам на тэлефон 101 або 112;

чакайце прыбыцця спецыялістаў для дапамогі.