Кіраўнік hoster.by: IT-краіна адкочваецца назад мінімум на пяць гадоў

Сяргей Павалішаў пракаментаваў сітуацыю на рынку хостынгу.

Рынак хостынгу ў Беларусі скароціцца да канца года на 20%. IT-краіна адкочваецца назад мінімум на 5 гадоў. Такія прагнозы зрабіў кіраўнік hoster.by Сяргей Павалішаў, піша tut.by.

- Калі коратка - то прырост у нацыянальнай даменнай зоне ў жніўні - мінус 350% у параўнанні з сярэднім лікам рэгістрацый у месяц. Як сябе адчувае байнэт? За ўвесь час працы ў гэтай сферы я не памятаю такіх лічбаў, - напісаў Павалішаў.

Да таго, што адбываецца, піша ён, ставіцца нейтральна нельга.

- Калі згортваецца бізнэс і людзі не адкрываюць новы - гэта дрэнна. Калі не працуе інтэрнэт, а тысячы IT-спецыялістаў пакуюць валізкі - гэта жудасна. Калі людзі не адчуваюць сябе ў бяспецы за межамі кватэры, - гэта катастрофа. Гэта факты, а не меркаванне, і нейтральнага стаўлення да гэтага быць не можа.

Як піша Павалішаў, кампаніі прыйшлося скасаваць Форум у кіраванні інтэрнэтам, у тым ліку і таму, што яны не могуць гарантаваць бяспеку ўдзельнікам, а таксама наяўнасць інтэрнэту.

- Галоўнае для IGF - дыялог. А само паняцце «дыялог» у апошнія тыдні абясцэнілася. Абмен рэплікамі, пры якім хоць бы адзін бок не зацікаўлены ў тым, каб пачуць іншы, гэта проста шум і марнаванне часу. Нарэшце, улічваючы глыбіню крызісу ў краіне, лічым абмеркаванне развіцця інтэрнэту ў такі час папросту неэтычным.

Сяргей Павалішаў адзначае, што «бясконца балюча глядзець, як калегі з іншых кампаній разглядаюць варыянты пераезду. Выдатныя мазгі, бясконцы патэнцыял, грошы - усё пачынае вылівацца з краіны як праз прабоіну ў судне».

- Мы - рэдкі тып IT-кампаніі без перспектыў па рэлакейту. І хоць у дні адключэння інтэрнэту мы недаатрымлівалі да 50% даходу, нам папросту няма куды з'язджаць, бо байнэт з сабой не забярэш.

Спецыяліст прагназуе скарачэнне рынку хостынгу на 20% да канца года.

- Гэта вельмі шмат, IT-краіна адкочваецца назад мінімум на 5 гадоў. Думаю, што толькі для буйных правайдэраў падзенне попыту не будзе катастрафічным, - піша Павалішаў.