Беларускія кібер-партызаны: Будзем хістаць рэжым, пакуль ён не абрынецца
28- 24.09.2020, 18:56
- 72,265
Мэта хакераў-патрыётаў - аднавіць справядлівасць і хутчэй вызваліць нашу краіну ад дыктатара.
Беларускія кібер-партызаны навялі шоргату ў беларускім сегменце інтэрнэту. Хакеры спрабуюць «пакласці» інфармацыйныя сістэмы розных дзяржорганаў і ўжо абвяшчалі пра напады на мытны камітэт, сістэму АРІП, сайт МУС і іншыя інфармацыйныя рэсурсы.
Хто гэтыя людзі, ці ёсць у іх кіраўнік, адкуль яны «працуюць»? Усе гэтыя пытанні пакуль што застаюцца без адказу. «Еўрарадыё» атрымалася раскруціць «Кібер Партызан» на невялікае інтэрв'ю.
- Як бы вы вызначылі сябе?
- Вызначэнне нас - супраціў, віртуальны пратэст, кіберфронт. Мэта - аднавіць справядлівасць, націснуць на рэжым Лукашэнкі, каб той хутчэй вызваліў нашу краіну.
- Якія вашы далейшыя намеры? Калі вы зразумееце, што пара згортвацца?
- Мы збіраемся сфармаваць кіберзгуртаванне, з якім не зможа даць рады састарэлая сістэма «саўка». Актыўнасць будзе павялічвацца. Калі мы даможамся змены ўлады, то пераключым тумблер у рэжым стварэння.
- Як доўга вы плануеце «хістаць рэжым»?
- Пакуль не абрынецца. Нас пакуль не ўспрымаюць сур'ёзна, але ўсё ідзе сваім парадкам. У адваротным выпадку мы дойдзем да грашовых аперацый, а пакуль былі толькі папярэджанні.
- Супраць каго скіраваныя вашы атакі? Як вы выбіраеце мэты?
- Некарэктны пытанне. Выбіраем паслядоўна.
- Ці варта шараговым грамадзянам Беларусі асцерагацца кіберпартызан?
- Не, не варта, і мы адчуваем падтрымку большасці. Нават калі мы прыносім нязручнасці, то яны часовыя.
- Як бы вы ацанілі абарону сайтаў беларускіх дзяржаўных органаў?
- Блізу нуля. Дзяржаўныя сайты - гэта так, забаўка.
- Як, па-вашаму, улада, якая змагаецца за выжыванне, будзе рэагаваць на кібератакі?
- Адкажу пытаннем на пытанне: а як яна можа рэагаваць?
- Ці сустрэлі вы нейкі сур'ёзны супраціў з боку дзяржаўных кіберабаронцаў?
- Не, і не бачылі. Нават паклалі іх сайты ў тым ліку.