Славакія зноў увяла надзвычайнае становішча праз каранавірус
- 30.09.2020, 17:21
- 13,123
Надзвычайнае становішча ўводзіцца на 45 дзён.
Як паведамляе Сharter97.org са спасылкай на прэс-службу ўрада Славакіі, Браціслава ўхваліла паўторнае ўвядзенне надзвычайнага становішча праз пандэмію каранавіруса.
Надзвычайнае становішча зноў пачне дзейнічаць у Славакіі з 1 кастрычніка.
У краіне ўжо было ўведзенае надзвычайнае становішча падчас першай хвалі пандэміі - гэта ў асноўным тычылася сферы аховы здароўя і сацыяльных паслуг і доўжылася 90 дзён, з 16 сакавіка да 14 чэрвеня.
Пакуль невядома, у якой ступені ўрад будзе ўжываць яго на гэты раз.
Прэм'ер Ігар Матовіч паведаміў, што пакуль надзвычайнае становішча ўводзіцца на 45 дзён. З яго слоў, пасля гэтага ўрад ацэніць, ці магчымае вяртанне да нармальнага жыцця.