Генеральны сакратар NATO павіншаваў Байдэна: Гэта пачатак новага раздзелу ў трансатлантычных дачыненнях

Енс Столтэнберг нагадаў, што чакае Байдэна на саміце NATO ў Брусэлі.

Генеральны сакратар NATO Енс Столтэнберг павіншаваў Джо Байдэна з заняццем пасады прэзідэнта ЗША.

Пра гэта гаворыцца ў заяве NATO, паведамляе «Европейская правда».

«Ад імя Арганізацыі Паўночнаатлантычнай дамовы я віншую Джо Байдэна з інаўгурацыяй у якасці 46-га прэзідэнта ЗША і Камалу Харыс на пасадзе віцэ-прэзідэнта. Сёння пачатак новага раздзелу для трансатлантычнага альянсу», - заявіў Столтэнберг.

Ён адзначыў, што сувязь паміж Паўночнай Амерыкай і Еўропай з'яўляецца асновай агульнай бяспекі, а моцнае NATO карыснае як для Паўночнай Амерыкі, так і для Еўропы.

«Сябры NATO павінны аб'яднацца для развязання наступстваў для бяспекі, звязаных з ростам Кітая, пагрозай тэрарызму, у тым ліку ў Афганістане і Іраку, і больш напорыстай Расеяй. Ніхто з нас не можа самастойна вырашыць гэтыя выклікі, але разам у NATO мы прадстаўляем адзін мільярд людзей і палову сусветнай вайсковай і эканамічнай моцы», - заявіў генеральны сакратар Альянсу.

Ён нагадаў, што чакае Байдэна на саміце NATO ў Брусэлі.

«У цэнтры ўвагі будзе NATO-2030, ініцыятыва зрабіць наш моцны Альянс яшчэ мацнейшым і больш прыдатным для будучыні», - адзначыў Столтэнберг.