Сітуацыю ў Беларусі абмеркавалі дыпламаты і кіраўнікі органаў нацыянальнай бяспекі Польшчы і Украіны

Сітуацыя ў Беларусі выключна важная не толькі для Украіны і Польшчы, але і для ўсёй Еўропы.

Сітуацыя ў Беларусі абмеркаваная ў ходзе відэаканферэнцыі дыпламатаў і кіраўнікоў органаў нацыянальнай бяспекі Польшчы і Украіны.

Мерапрыемства пад назвай «Дэмакратычная і бяспечная Беларусь. Погляд з Украіны і Польшчы» прайшло на ініцыятыву сакратара Рады нацыянальнай бяспекі і абароны Украіны (РНБА) Аляксея Данілава і кіраўніка Бюро нацыянальнай бяспекі (БНБ) Польшчы Паўла Салоха, паведамляе БелаПАН са спасылкай на прэс-службу ўкраінскага Міністэрства замежных спраў.

Са слоў Данілава, сітуацыя ў Беларусі выключна важная не толькі для Украіны і Польшчы, але і для ўсёй Еўропы, у тым ліку ў кантэксце росту ўплыву Расеі на палітычныя і грамадскія працэсы ў краіне. У сувязі з гэтым асаблівую актуальнасць для Украіны набывае сітуацыя на мяжы з Беларуссю, заявіў кіраўнік РНБА. Ён падкрэсліў важнасць «пастаяннага абмену інфармацыяй пра падзеі ў Беларусі паміж ведамствамі ў бяспецы Украіны і Польшчы».

Данілаў уважае неабходным стварэнне пастаянна дзейнай рабочай групы на ўзроўні РНБА і БНБ у пытаннях бяспекі ў рэгіёне «з далейшым магчымым прыцягненнем літоўскага боку» (т.зв. Люблінскі трохкутнік).

«Беларусь - гэта частка нашай агульнай Еўропы, і яе дэмакратычнае развіццё вельмі важнае», - адзначыў кіраўнік РНБА.

Са слоў кіраўніка БНБ Салоха, сітуацыя ў Беларусі апошнія месяцы становіцца ўсё больш важнай тэмай польска-ўкраінскага супрацоўніцтва. «Аснова нашай бяспекі - як Украіны, так і Польшчы - незалежная, дэмакратычная Беларусь, грамадзяне якой самі вырашаюць лёс сваёй дзяржавы. Таму мы кроўна зацікаўлены падтрымліваць працэс дэмакратызацыі Беларусі. Нам важная таксама паслядоўная і рашучая падтрымка Захаду ў дачыненні да кіруючага ў Беларусі рэжыму», - заявіў Солах, якога цытуе прэс-служба БНБ.

Як адзначыў намеснік міністра замежных спраў Украіны Васіль Боднар, для яго краіны і ўсёй Еўропы вельмі важна, каб Беларусь заставалася суверэннай і незалежнай дзяржавай, «падалей ад уплыву Расеі». Украіна «гатова супрацоўнічаць у розных фарматах з мэтай садзейнічання Беларусі ва ўрэгуляванні палітычнага крызісу», сказаў дыпламат.

Мерапрыемства складалася з двух панэляў: аналіз цяперашняй сітуацыі ў Беларусі і ацэнка магчымых дзеянняў Польшчы і Украіны ў падтрымцы беларускай грамадзянскай супольнасці і незалежнасці краіны.