Брытанскія СМІ пра падрабязнасці буйной афёры: Падазраваны ўцёк праз Менск

Уцёкі быў здзейсненыя на бізнэс-джэце.

У Еўропе працягваецца скандал вакол фінтэх-кампаніі Wirecard, крах якой называюць адным з найбуйнейшых пасляваенных махлярстваў у сферы бухгалтарскага ўліку ў Еўропе, у выніку якога прапала 1,9 мільярда еўраў карпаратыўных сродкаў. Днямі стала вядома аб новых затрыманнях і было пацверджана, што галоўны фігурант уцёк праз Менск, піша tut.by.

Былога гендырэктара Wirecard Маркуса Браўна і некалькіх былых топ-мэнэджараў некалькі месяцаў таму ўзялі пад варту ў Нямеччыне.

Адзін з галоўных удзельнікаў скандалу Ян Марсалек, са звестак СМІ, схаваўся ў Падмаскоўі. Ягоныя ўцёкі і знікненне - адна з галоўных інтрыг расследавання. У нядзелю, 24 студзеня, брытанская The Financial Times паведаміла, што два аўстрыйцы арыштаваныя за арганізацыю ўцёкаў.

Венская паліцыя арыштавала былога высокапастаўленага чыноўніка аўстрыйскай сакрэтнай службы і былога дэпутата правага крыла, якіх абвінавачваюць у арганізацыі ўцёкаў Яна Марсалека ў Беларусь у чэрвені 2020 года. Топ-мэнэджар кампаніі Wirecard уцёк неўзабаве пасля таго, як яго адхілілі ад працы ў кампаніі і за некалькі дзён да таго, як пракуратура Мюнхена выдала ордэр на ягоны арышт. FT адзначае, што былога галоўнага аперацыйнага дырэктара Wirecard называюць натхняльнікам махлярства, якое прывяло да падзення Wirecard. Пракуратура падазрае, што 40-гадовы грамадзянін Аўстрыі, які фігуруе ў спісе самых вышукваных Інтэрполам, асабіста прысвоіў сотні мільёнаў еўраў.

Дакладнае месцазнаходжанне Марсалека дагэтуль невядома, але The Financial Times спасылаецца на паліцэйскі дакумент, які стаў першым афіцыйным пацвярджэннем таго, што летась ён уцёк з Аўстрыі ў Беларусь на прыватным самалёце Cessna Citation Mustang 510, за які ён заплаціў гатоўкай. Арганізавалі гэты пералёт акурат два затрыманыя ў Вене чалавекі.

Раней удзельнікі міжнароднага журналісцкага расследавання паведамлялі, што былы чалец рады дырэктараў збанкрутавалай Wirecard ужо шмат гадоў знаходзіўся ў фокусе расейскіх спецслужбаў.

Падчас сумеснага журналісцкага расследавання, у якім удзельнічалі супрацоўнікі Der Spiegel, The Insider, Bellingcat і медыягрупа McClatchy, высветлілася, што Ян Марсалек падтрымліваў на здзіўленне інтэнсіўныя сувязі з нейкімі партнёрамі ў Расеі.

«Згодна з іміграцыйных звестак, якія трапілі ў распараджэнне Bellingcat, Марсалек быў частым госцем у Расеі: за апошнія 10 гадоў ён здзейсніў больш за 60 паездак у краіну. Яго іміграцыйнага дасье налічвае 597 старонак, што значна больш, чым у любога замежніка, з якім мы сутыкаліся за пяць гадоў такіх расследаванняў», - піша The Insider.

Характэрна, што Марсалек лётаў у Расею часта на чартэрных бізнэс-джетах і праводзіў у Маскве, як правіла, усяго некалькі гадзін. Падчас расследавання высветлілася таксама, што з 2015 года Марсалек займаўся нібыта камерцыйнымі праектамі ў Лібіі, а напраўду - планамі для стварэння прыватных вайсковых кампаній, піша Deutsche Welle.