Ілон Маск падрыхтаваўся вывесці Cybertruck на вуліцы

Распрацоўка дызайну электрычнага пікапа скончаная.

Заснавальнік Tesla Ілон Маск абвясціў, што распрацоўка дызайну электрычнага пікапа Cybertruck скончаная. Ён збіраецца вывесці электракар на вуліцы ўжо ў 2021 годзе. Пра гэта Маск казаў падчас онлайн-сустрэчы з акцыянерамі Tesla, піша Business Insider.

«Калі поспех будзе на нашым баку, мы зможам паставіць першыя пікапы да канца гэтага года. Але я чакаю, што масавую вытворчасць удасца наладзіць толькі ў 2022 годзе», - сказаў ён. Бізнэсовец адзначыў, што ствараць прататыпы прадукцыі вельмі проста, а маштабаваць вытворчасць складана.

Tesla плануе збіраць Cybertruck на сваім заводзе ў Осціне, штат Тэхас. Прадпрыемства пакуль будуецца, але рыхтуецца пачаць працу ў 2021 годзе. Інвестыцыі ў праект, як чакаецца, складуць блізу мільярд даляраў. Акрамя Cybertruck, на заводзе збіраюцца вырабляць прычэпы для пікапа, а таксама электракары Model 3 і Model Y.

Пакуль у Tesla толькі адзін завод у ЗША - у штаце Каліфорнія. Акрамя таго, у пачатку 2020 года амерыканскі вытворца адкрыў завод у Шанхаі. Таксама цяпер кампанія будуе сваё першае еўрапейскае прадпрыемства, якое размесціцца ў Нямеччыне.

Маск прадэманстраваў Cybertruck увосень 2019 года. Корпус аўтамабіля зроблены з куленепрабівальнай сталі, а вокны выкананыя са звышмоцнага шкла і палімернага кампазіту.