Пуцін паказаў Лукашэнку «дулю ў кішэні»
4- 14.10.2021, 12:03
- 26,444
Замест візіту ў Менск кіраўнік РФ прымае ўдзел у працы валдайскага форуму.
Пуцін не прыляцеў на важныя для Лукашэнкі мерапрыемствы ў Менск нібыта праз каранавірус, але асабіста возьме ўдзел у працы дыскусійнага клуба «Валдай».
Пра гэта заявіў журналістам прэс-сакратар кіраўніка РФ Дзмітрый Пяскоў, паведамляе ria.ru.
«Валдайскі форум - мы будзем працаваць, гэта будзе ў вочным фармаце», - сказаў журналістам Пяскоў.
Нядаўна стала вядома, што прэзідэнт Расеі не прыехаў у Менск на саміты СНД і ЕАЭС 14 і 15 кастрычніка. Пуцін будзе ўдзельнічаць у іх у фармаце відэаканферэнцыі.
Пры гэтым ягоны візіт шырока анансаваўся ў СМІ па выніках перамоў з Лукашэнкам 9 верасня ў Маскве.
Сярод магчымых прычын непрыезду называюць каранавірус, а таксама сітуацыю з закрыццём «Комсомольской правды в Беларуси».
Характэрна, што сёння быў абвешчаны вочны ўдзел Пуціна ў пасяджэнні валдайскага дыскусійнага клуба, які адбудзецца на наступным тыдні.
Кіраўнік Расеі не быў у Беларусі з 2019 года. Лукашэнка пасля выбараў ужо 6 разоў лётаў да Пуціна.
Палітолаг Андрэй Суздальцаў назваў скасаванне візітаў Уладзіміра Пуціна ў Менск «катастрофай для Лукашэнкі».